ქვეყანაში ღარიბი ბავშვების რაოდენობის ზრდის ტენდენციის თაობაზე საუბრობს პარტია ,,სტრატეგია აღმაშენებლის“ სოციალური მიმართულების ხელმძღვანელი თეონა ჭალიძე და მთავრობას კონკრეტული ნაბიჯებიც გადგმისკენ მოუწოდებს:
,,ქვეყანაში ღარიბი ბავშვების რაოდენობა გაიზარდა. ბოლო 15 თვის განმავლობაში სიღარიბის ზღვარს ქვემოთ მყოფი ბავშვების რაოდენობა 41 155-ით გაიზარდა და დღეის მონაცემებით 192 962-ს შეადგენს. საარსებო შემწეობის მიმღები ბავშვების რაოდენობა გაიზარდა ყველა რეგიონში. თბილისში 11 340-ით.
თბილისის შემდეგ ყველაზე მეტი ბავშვია სიღარიბის ზღვარს მიღმა იმერეთში, ქვემო ქართლში, კახეთსა და აჭარაში. საარსებო შემწეობა არის ფულადი სოციალური დახმარება, რომელიც განკუთვნილია შეფასების სისტემით იდენტიფიცირებული ღატაკი ოჯახების სოციალურ-ეკონომიკური მდგომარეობის გაუმჯობესებისათვის. თუმცა საარსებო შემწეობის ოდენობა (მაქსიმუმ 60 ლარია, ბავშვების შემთხვევაში დამატებით 50 ლარი, საიდანაც რიგ მუნიციპალიტეტებში 30 ლარი კვების ბარათზე ირიცხება) ვერ პასუხობს დღეს არსებულ გამოწვევებს. საკვებ პროდუქტზე არსებული ფასების ზრდა განსაკუთრებით მძიმედ სწორედ საარსებო შემწეობის მიმღებ ოჯახებზე აისახება.
აუცილებელია მთავრობამ იზრუნოს ამ მიმართულებით და დღის წესრიგში დადგეს ე.წ. ,,ახალი ღარიბების“ საჭიროებების შესწავლაც და ამის მიხედვით კონკრეტული ნაბიჯებიც გადაიდგას,” – აცხადებს თეონა ჭალიძე.
ბოლო 15 თვის განმავლობაში ბავშვთა სიღარიბის მაჩვენებლის ზრდის სტატისტიკური მონაცემები:
| 2020 წლის იანვარი | 2021 წლის მარტი | |
| თბილისი | 32 254 | 43 594 |
| გურია | 6 501 | 7 825 |
| რაჭა-ლეჩხუმი და ქვემო სვანეთი | 2 339 | 2 635 |
| კახეთი | 16 205 | 20 360 |
| იმერეთი | 19 650 | 24 216 |
| მცხეთა-მთიანეთი | 4 361 | 5 399 |
| სამეგრელო-ზემო სვანეთი | 18 691 | 22 278 |
| სამცხე-ჯავახეთი | 4 338 | 5 537 |
| ქვემო ქართლი | 18 080 | 24 840 |
| შიდა ქართლი | 13 497 | 16 221 |
| აჭარის ავტონომიური რესპუბლიკა | 15 891 | 20 057 |
| სულ | 151 807 | 192 962 |
ინფორმაციას “სტრატეგია აღმაშენებლის” საზოგადოებასთან ურთიერთობის სამსახური ავრცელებს