არჩილ თალაკვაძემ პარლამენტის თავმჯდომარეობიდან პოსტი დატოვაა. სპეციალურად გამართულ ბრიფინგზე მან განაცხადა, რომ ოპოზიციასთან შეთანხმების მიღწევის შემდეგ, მიზანშეწონილია როტაციის განხორციელებ საპარლამენტო უმრავლესობაში და იგი დარბაზში ინაცვლებს:
“მინდა გაგაცნოთ სიახლე საკადრო ცვლილებებთან დაკავშირებით.
იმის გათვალისწინებით, რომ რამდენიმეთვიანი დაძაბული მოლაპარაკებები დასრულდა შეთანხმებით, რომელშიც პარტიის თავმჯდომარესთან ერთად მე პარტია “ქართულ ოცნებას” წარმოვადგენდი ვთვლი, რომ პარლამენტში შემდგომი პოლიტიკური პროცესის სწორად წარმართვისთვის მართებული იქნება დავტოვო სპიკერის პოზიცია და ამ თანამდებობაზე წარვადგინოთ ადამიანი, რომელიც პარლამენტის მუშაობას უფრო ნეიტრალური პოზიციიდან გაუძღვება. შესაბამისად, მივიღეთ გადაწყვეტილება, რომ გავაკეთოთ როტაცია.
ახლა, როცა პარლამენტში წარმომადგენლობითი ოპოზიცია გვყავს, ვთვლი, ჩემი ადგილი დარბაზშია კოლეგების გვერდით და არა სპიკერის პოზიციაზე.
ჩემთვის, რა თქმა უნდა, დიდი პატივი იყო მე-9 და მე-10 მოწვევის პარლამენტებში პარლამენტის თავმჯდომარის თანამდებობაზე მუშაობა.
მადლობას ვუხდი გუნდს, განსაკუთრებით ჩვენს თანმოქალაქეებს, მხარდაჭერისთვის, მოთმინებისა და გვერდით დგომისთვის. ერთად განვაგრძობთ მუშაობას და ბრძოლას მომავალი წარმატებისთვის და ჩვენ აუცილებლად მოვიპოვებთ ახალ გამარჯვებებს და უზრუნველვყოფთ ქვეყანაში პროგრესს,”- განაცხადა არჩილ თალაკვაძემ.