გახარიას გუნდმა პარლამენტში პარტია “ქართული ოცნება” დატოვა

69

პარტია ,,ქართული ოცნება’’ საქართველოს პარლამენტის ექვსმა დეპუტატმა დატოვა. ამ საკითხთან დაკავშირებით გამართულ ბრიფინგზე გიორგი ხოჯევანიშვილმა აღნიშნა, რომ ისინი გიორგი გახარიასთან ერთად შეუერთდებიან პარტიის მშენებლობის პროცესს. გახარიას თანამოაზრეებისთვის მიუღებელია პოლიტიკური პარტიების დაპირისპირება, მაშინ როცა ქვეყანა ბევრად სერიოზული გამოწვევების წინაშე დგას.

,,გიორგი გახარიასთან ერთობლივი გადაწყვეტილებით, გადავდივართ პარტიის მშენებლობის ახალ ეტაპზე. ჩვენი ქვეყანა სერიოზული გამოწვევების წინაშე დგას, მოქალაქეებს უწევთ ყოველდღიურ რეჟიმში გამკლავება ისეთი პრობლემების წინაშე, როგორიცაა – პანდემია, ეკონომიკური კრიზისი, უმუშევრობა, სიდუხჭირე, ეს ის პრობლემებია, რომელიც ჩვენს მოსახლეობას აინტერესებს და არა ის დაუსრულებელი პოლიტიკური პარტიების დაპირისპირება და კინკლაობა’’, – აღნიშნა გიორგი ხოჯევანიშვილმა.

პარტიიდან წასვლის შესახებ მიღებულ გადაწყვეტილებას გამოეხმაურა ბექა ლილუაშვილიც. ჟურნალისტებთან საუბრისას, მან კიდევ ერთხელ გაუსვა ხაზი ქვეყანაში არსებულ პოლიტიკურ ვითარებას და აღნიშნა, რომ პოლიტიკური სპექტრი რადიკალიზებულია. ლილუაშვილის თქმით, ქვეყანაში ისევ დაუძლეველ პრობლემად რჩება კორუფცია და ნეპოტიზმი:

,,საზოგადოება და პოლიტიკური სპექტრი არის სრულად რადიკალიზებული, მაგალითად, ის რომ გვაქვს სუსტი სახელმწიფო ინტერესები, კიდევ გვიწევს საუბარი კორუფციაზე, ნეპოტიზმზე, ეს ყველაფერი არის ის, რაზეც ჩვენ მაშინაც ვამბობდით, როცა ვიყავით პარტიის წევრები, ვიზიარებთ ამ პასუხისმგებლობას და ვუსწორებთ ამ პრობლემებს თვალს’’, – განაცხადა ბექა ლილუაშვილმა.

მას შემდეგ რაც ექვსმა დეპუტატმა, უმრავლესობა დატოვა ,,ქართულ ოცნებას’’ პარლამენტში 84 დეპუტატი ჰყავს. დეპუტატების ამ გადაწყვეტილებას პარლამენტის თავმჯდომარე, არჩილ თალაკვაძე გამოეხმაურა. მისი თქმით, გადაწყვეტილება იმის დასტურია, რომ ყოფილი თანაგუნდელები იმ პასუხისმგებლობას გაექცნენ, რაზეც პასუხისმგებლები თავადაც იყვნენ:

,,სირცხვილია, როდესაც შენს საერთო პასუხისმგებლობას ტოვებ, გადიხარ აქედან და საუბრობ ზუსტად იმ პრობლემებზე, რომელზეც შენც გეკისრება პასუხისმგებლობა და შენც გაქვს ვალდებულება, რომ ამის მოსაგვარებლად იმუშავო.

გიორგი გახარიამ, იხელმძღვანელა პირადი ინტერესებით, მაშინ, როდესაც კონსოლიდაცია, ერთად მუშაობა იყო ყველაზე საჭირო, მან დატოვა გუნდი, შემდეგ კი მისმა მეგობრებმა დატოვეს საპარლამენტო უმრავლესობა’’, – განაცხადა არჩილ თალაკვაძემ.

პარტია ,,ქართული ოცნებაში’’ მიმდინარე პროცესებებს გამოეხმაურა ოპოზიციაც. ,,ევროპული საქართველოს’’ თავმჯდომარე გიგა ბოკერია აღნიშნავს, რომ აუცილებელია ჯერ გახარიას გუნდმა საკუთარი პოზიცია დააფიქსიროს ქვეყანაში მიმდინარე პროცესებთან დაკავშირებით, როგორიცაა ვადამდელი არჩევნები და პოლიტიკური პატიმრების გათავისუფლების საკითხი. მისი თქმით, ყველა ნაბიჯი, რაც პროცესების დაჩქარებას ხელს შეუწყობს საზოგადოებისთვის არის მისაღები:

,,რაც შეეხება ამ ადამიანების გასვლას და ე.წ. გახარიას ფაქტორს, ჯერ მკაფიოდ დააფიქსირონ პოზიცია. პასუხები გასცეს გიორგი გახარიამ უამრავ კითხვას, რომელიც მასთან არის. დააფიქსირონ პოზიცია, როგორც ვადამდელ არჩევნებზე, ისე პოლიტიკური პატიმრების გათავისუფლების საკითხთან დაკავშირებით. მერე ვნახოთ რაოდენობა ამ ადამიანების. თავისთავად ყველაფერი, რაც ამა თუ იმ ფორმით, ხელს შეუწყობს პროცესის დაჩქარებას ნორმალური ვადამდელი არჩევნების ჩატარების და პოლიტპატიმრების გათავისუფლების, ჩვენთვის, საზოგადოებისთვის არის პოზიტიური,’’ – განაცხადა გიგა ბოკერიამ.

ინფორმაციისთვის: გიორგი გახარიამ პრემიერ-მინისტრის თანამდებობა 18 თებერვალს დატოვა. გახარიას თქმით, ამ გადაწყვეტილების მიზეზი, ,,ერთიანი ნაციონალური მოძრაობის’’ ლიდერის, ნიკა მელიას დაპატიმრების ირგვლივ მასსა და მმართველ გუნდს შორის აზრთა სხვადასხვაობა იყო. გარკვეული პაუზის შემდეგ, ყოფილმა პრემიერმა, 22 მარტს განაცხადა, რომ ის პოლიტიკიდან წასვლას არ აპირებს, თუმცა სამომავლო გეგმებთან დაკავშირებით ოფიციალური განცხადება არ გაუკეთებია.

ავტორი
ნინო დავითაძე

კომენტარები