ადვოკატთა ინსტიტუტმა, საქართველოს სხვა ინსტიტუტების მსგავსად, რეფორმების არაერთგვაროვანი პროცესი გაიარა. ხანგრძლივი პაუზის შემდეგ, დღეს მას არეგულირებს და წარმოადგენს ეროვნული პროფესიული ორგანო – საქართველოს ადვოკატთა ასოციაცია (GBA). ასოციაციის თავმჯდომარე, აღმასრულებელი საბჭო და ეთიკის კომისია ინტენსიურად მუშაობენ ადვოკატთა რეპუტაციის ამაღლებისთვის და პროფესიული სტანდარტების, მათ შორის ეთიკური ქცევის გაუმჯობესებისთვის.
საქართველოში საადვოკატო საქმიანობას ახორციელებს ადვოკატი. ადვოკატი არის თავისუფალი პროფესიის პირი, რომელიც ემორჩილება მხოლოდ კანონსა და პროფესიული ეთიკის ნორმებს და გაწევრიანებულია საქართველოს ადვოკატთა ასოციაციაში. საკუთარი გამოცდილებით შემიძლია ვთქვა, რომ ადვოკატს სამართალწარმოებაში განსაკუთრებული ადგილი უკავია. ის მოსამართლესთან ერთად ფაქტობრივად ქმნის სამართლის ისტორიას.
შეჯიბრებით პროცესში სიმართლის დადგენა დამოკიდებულია მხარეების მიერ სასამართლოში წარმოდგენილ მტკიცებულებებზე ამიტომ, სამართლებრივ სახელმწიფოში პროცესის სამართლიანობისათვის დიდი მნიშვნელობა ენიჭება მხარეთა თანასწორობის უზრუნველყოფას. ხშირ შემთხვევაში ადვოკატის კვალიფიკაცია და გამოცდილება განსაზღვრავს სასურველი შედეგის დადგომის შესაძლებლობას.
საქართველოს კანონი ადვოკატთა შესახებ განგვიმარტავს საადვოკატო საქმიანობის ძირითად მიმართულებებს კერძოდ: „საადვოკატო საქმიანობა მოიცავს: ადვოკატის მიერ იურიდიული რჩევის მიცემას იმ პირისათვის, რომელმაც მას დახმარებისათვის მიმართა (კლიენტი); კლიენტის წარმომადგენლობას საკონსტიტუციო დავის, სისხლის, სამოქალაქო ან ადმინისტრაციული სამართლის საქმეზე სასამართლოში, არბიტრაჟში, დაკავების, გამოძიების ორგანოებში; მესამე პირის მიმართ სამართლებრივი დოკუმენტების მომზადებას და კლიენტის სახელით ნებისმიერი დოკუმენტაციის წარდგენას; ისეთი იურიდიული დახმარების გაწევას, რომელიც არ უკავშირდება მესამე პირის წინაშე წარმომადგენლობას“. ადვოკატმა უნდა გამოიყენოს ყველა საშუალება, რომელიც აკრძალული არ არის კანონმდებლობით, კლიენტის დასაცავად.
სსიპ საქართველოს ადვოკატთა ასოციაციის ადვოკატთა პროფესიული ეთიკის კოდექსი თავის თავში განსაზღვრავს იმ ძირითად მიმართულებებს, რომლებიც ადვოკატთა მიერ აუცილებელია გასათვალისწინებლად, კერძოდ ადვოკატი ვალდებულია დაიცვას მთელი რიგი პროფესიული საქმიანობის ძირითადი პრინციპები: დამოუკიდებლობა, ნდობა, კონფიდენციალობა, კლიენტის ინტერესების პრიორიტეტულობა, ინტერესთა კონფლიქტის დაუშვებლობა, კოლეგიალურობა.
ყოველივე ზემოთაღნიშნულის გათვალისწინებით შეიძლება ითქვას, რომ ადვოკატის პროფესია სულაც არ არის იოლი და იყო ადვოკატი ნამდვილად წარმოადგენს ღირსებას როგორც ცალკეული პირებისათვის, ასევე სახელმწიფოსათვის. ძლიერი ადვოკატთა კორპუსი ნიშნავს იყოს დაცული და გქონდეს კანონით გარანტირებული უფლებები რეალიზებული.
საინფორმაციო სააგენტო “პარალელის” ექსპერტი, იურისტი
გვანცა ცაბაძე
