“გამოცხადდეს სრული მორატორიუმი ნებისმიერ ახალ სამშენებლო პროექტზე” – თორნიკე რიჟვაძე ბათუმის ბულვართან დაკავშირებით

აჭარის მთავრობის თავმჯდომარის, თორნიკე რიჟვაძის განცხადებით, ბათუმის ბულვარის ყველა ახალ მშენებლობაზე სრული მორატორუმი დაწესდება. კანონმდებლობით დადგენილი პროცედურების გავლის შემდეგ კი – ბულვარი სამართავად ბათუმის მუნიციპალიტეტს გადაეცემა:

,,ჩვენმა პოლიტიკურმა გუნდმა მიიღო გადაწყვეტილება, რომ ბათუმის ბულვარის, ისტორიულ-კულტურული მემკვიდრეობის საზღვრებით გათვალისწინებულ ტერიტორიაზე, განაშენიანებისა და კონსერვაციის გეგმის კანონმდებლობით დადგენილი წესით დამტკიცებამდე, გამოცხადდეს სრული მორატორიუმი ნებისმიერ ახალ სამშენებლო პროექტზე”, – განაცხადა თორნიკე რიჟვაძემ.

მთავრობის სხდომაზე, თორნიკე რიჟვაძემ ყურადღება გაამახვილა შემდეგ გარემოებაზე, რომ ბათუმის ბულვარის ეკონომიკისა და ფინანსთა სამინისტროსთვის სამართავად გადაცემა შეცდომა იყო.

,,ვავალებ ეკონომიკის მინისტრს და ვთხოვ ბათუმის თვითმმართველობას, რომ კანონმდებლობით დადგენილ ვადებში, უსწრაფესად უზრუნველყონ ბათუმის ბულვარის მუნიციპალიტეტისთვის სამართავად გადაცემა. ამ გადაწყვეტილებით პასუხი გაეცემა ყველა იმ კითხვას, რაც საკითხთან დაკავშირებით შესაძლოა არსებობდეს”, – აღნიშნა თორნიკე რიჟვაძემ.

ავტორი
ნინო დავითაძე