“კიდევ ერთხელ ვადასტურებთ მზადყოფნას მოლაპარაკებისთვის, იმისთვის, რომ ქვეყანაში განიმუხტოს პოლიტიკური კრიზისი” – პაატა მანჯგალაძე

პოლიტიკური პლატფორმა ,,სტრატეგია აღმაშენებლის” გენერალურ მდივანს, პაატა მანჯგალაძეს მნიშვნელოვნად მიაჩნია დაგეგმილი საპროტესტო აქციების დროებით გადადება, რომ ხელისუფლებამ იგი არ გამოიყენოს მოლაპარაკებაზე უარის თქმის ან ჩაშლისთვის:

,,იმისთვის, რომ ხელისუფლებას არ მივცეთ დამატებითი საფუძველი, დამატებითი მიზეზი, უარი თქვას მოლაპარაკებაზე ანდა ჩაშალოს, ოპოზიციამ ერთად მივიღეთ გადაწყვეტილება და დაგეგმილი არაძალადობრივი აქციები გადავდეთ დროებით, ვიდრე არ დასრულდება მოლაპარაკების ვადა, რომელიც იყო განსაზღვრული 16 მარტამდე.

საერთო ფორმატში აქციები იქნება ნებაყოფლობით პატიების მხრიდან.
ვიცით, რომ ,,ნაციონალურ მოძრაობას” აქვს სპეციფიკური ვითარება, პარტიის თავმჯომარე დაჭერილია და შეუძლიათ ჩაატარონ აქციები, იმ პირობით, რომ ადმინისტრაციულ შენობასთან და პოლიციასთან არ ჰქონდეთ შეხება. ეს არის მთავარი იდეა, რომ ხელისუფლებამ და პოლიციამ არ მოახდინოს აქციის მონაწილეების დარბევა.

ხვალინდელი მანქანების აქცია, რა თქმა უნდა, იქნება. ამის შემდეგ დაგეგმილი აქციები რაც იყო, მათ შორის დიდი აქცია, 13-ის აქცია, გადაიდო. 13 მარტის აქცია სავარაუდოდ გადაიდო 20 რიცხვისთვის. ველოდებით მოლაპარაკებების შედეგებს. აქცია კი იქნება ზემშვიდობიანი, რომ ხელისუფლებას არ მივცეთ დამატებითი პროვოცირების საშუალება.

ჩვენ ვამბობდით და კიდევ ერთხელ ვადასტურებთ მზადყოფნას მოლაპარაკებისთვის, იმისთვის, რომ ქვეყანაში განიმუხტოს პოლიტიკური კრიზისი.

რაც შეეხება სამართლებრივ საფუძვლებს, ხელისუფლება საუბრობდა, რომ თუ ჩვენ ვიპოვიდით 1%-იან გადახრას საგამოძიებო კომისიაში, ეს გახდებოდა ვადამდელი არჩევნების საფუძველი. ეს ტკიცებულებები გაყალბებასთან დაკავშირებით ატვირთულია ცენტრალური საარჩევნო კომისიის გვერდზე, რადგან 3800 უბნიდან პროპორციულ ნაწილში დისბალანსი არ ჯდება დაახლოებით 1000 ოქმში. რაც არის 25%, არა თუ 1%. ამიტომ დღესვე შეგვიძლია, ვისაუბროთ ვადამდელ არჩევნებზე“, – განაცხადა პაატა მანჯგალაძემ.

ავტორი
ნინი ხიჯაკაძე