“ამ ქვეყნის თავზე, დენთის კასრის დაკიდება არავის ეპატიება” – ხატია დეკანოიძე

142

,,ერთიანი ნაციონალური მოძრაობის” ერთ-ერთმა ლიდერმა ხატია დეკანოიძემ განაცხადა, რომ ირაკლი ღარიბაშვილის რიტორიკა არ უწყობს ხელს ქვეყანაში მიმდინარე პროცესების სტაბილიზაციას. ასევე, აღნიშნავს, რომ საქართველოს მომავალი საფრთხის ქვეშაა და აუცილებელია საერთაშორისო პარტნიორების რჩევის მიღება – მოლაპარაკებები ხელისუფლებასა და ოპოზიციას შორის:

,,დღეს ერთპარტიული პარლამენტის ტრიბუნიდან ჩვენ მოვისმინეთ ძალიან შემაშფოთებელი განცხადებები „ქართული ოცნების“ პრემიერ-მინისტრობის კანდიდატისგან, ირაკლი ღარიბაშვილისგან, რომელიც ყოველთვის გამოირჩეოდა განსაკუთრებული აგრესიით, განსაკუთრებული ზიზღის ენით პოლიტიკური ოპონენტების, თავისუფალი მედიის და ყველა იმ ადამიანის, ჩვენი მეგობრების, საერთაშორისო პარტნიორების მიმართ, რომლებიც მხარს უჭერენ საქართველოს თავისუფლებისთვის ბრძოლაში.

ირაკლი ღარიბაშვილმა ღიად დაადასტურა, რომ მისი მთავარი პოლიტიკა – ეს იქნება დევნა პოლიტიკური ოპოზიციის. მან კიდევ ერთხელ დაადასტურა, რომ ნებისმიერი გადაწყვეტილება, რომელიც მიღებულია მართლმსაჯულების სისტემაში და მათ შორის, რა თქმა უნდა, ნიკა მელიას მიმართ, ეს არის პირდაპირ ბიძინა ივანიშვილის გადაწყვეტილება.

ირაკლი ღარიბაშვილის აგრესიული რიტორიკა, რა თქმა უნდა, ხელს არ უწყობს, რომ ქვეყანაში ეს მძიმე პოლიტიკური კრიზისი, რომელიც არსებობს მოლაპარაკების გზით განიმუხტოს. მიუხედავად იმისა, რომ ჩვენ ამ კრიზისის ფონზე, სრულიად ოპოზიციურმა სპექტრმა და პარტიებმა ღიად მოვუწოდეთ ხელისუფლებას ჩვენი საერთაშორისო პარტნიორების ჩართულობით გაგვეგრძელებინა მოლაპარაკებები. იგი ღიად უწოდებს პოლიტიკურ ოპონენტებს ყველა იმ სიტყვას, რომელიც მიუღებელია თანამედროვე ცივილიზაციისთვის და დემოკრატიისთვის. იგი ღიად უხდის მადლობას ბიძინა ივანიშვილს ჩარევისთვის მართლმსაჯულების სისტემაში და ყველაზე მნიშვნელოვანი: კრიმინალებს ღიად იმ ადამიანებს უწოდებს, რომლებიც იცავენ თავისუფალ სიტყვას და თავისუფლებას.

მე მინდა მოვუწოდო მას და თითოეულ იმ ადამიანს, რომელიც დღეს ხელს დააჭერს ღილაკს და ხმას მისცემს ირაკლი ღარიბაშვილს, უნდა გახსოვდეთ, რომ ამ ქვეყნის თავზე, დენთის კასრის დაკიდება არავის ეპატიება.

უნდა გვახსოვდეს, რომ დღეს საქართველოს ევროატლანტიკური მომავალი არის საფრთხის ქვეშ. უნდა გვახსოვდეს ის ყველაფერი, რაზეც საუბრობთ ირაკლი ღარიბაშვილი, იმის მაგივრად რომ ისაუბროს გაუბედურებულ და გაპარტახებულ ეკონომიკაზე, იმის მაგივრად რომ ისაუბროს ვაქცინაციაზე, იმის მაგივრად, რომ ისაუბროს მოქალაქეებზე, რომლებსაც საერთოდ არანაირი შემოსავალი არ აქვთ, მისი რიტორიკა გრძელდება ,,ნაციონალური მოძრაობისა” და პოლიტიკური ოპონენტების ჭრილში.

მე ყველაზე მნიშვნელოვნად რაც მიმაჩნია არის ის, რომ პოლიტიკური კრიზისი განიმუხტოს და ამ პოლიტიკური კრიზისის განმუხტვისთვის ჩვენ გვესახება საერთაშორისო პარტნიორების ყურის მიგდება და მათი ჩართულობით მოლაპარაკებები”,- განაცხადა ხატია დეკანოიძემ.

ავტორი
ნინი ხიჯაკაძე

კომენტარები