პოლიტიკური კლუბი „თავთავი“ Covid-19-ის ვაქვინის შემოტანასთან დაკავშირებით საქართველოს მე-3 პრეზიდენტის, მიხეილ სააკაშვილის მხრიდან ხელისუფლებისადმი გაკეთებულ შეთავაზებას ეხმიანება და მოითხოვს დაიწყოს მოლაპარაკებები ვაქცინის შემოტანასთან დაკავშირებით:
“პოლიტიკური კლუბი „თავთავი“ მოუწოდებს ხელისუფლებას დაუყონებლივ განიხილოს საქართველოს მესამე პრეზიდენტის, მიხეილ სააკაშვილის შეთავაზება და მალტის ხელისუფლებასთან დაიწყოს მოლაპარაკება ვაქცინის შემოტანის თაობაზე.
უზნეობა და არასახელმწიფოებრივი აზროვნების ნათელი მაგალითია როდესაც პირადი შუღლისა და ვიწრო პოლიტიკური ინტერესების გამო, უარს ამბობ თუნდაც მცირედ შანსზე, უმოკლეს დროში შემოიტანო პრემიუმ ხარისხის ვაქცინა, რაც სავსებით საკმარისი იქნება, პირველ ეტაპზე, ყველაზე მოწყვლადი ჯგუფისთვის. ყოველი დაკარგული დღე, ათობით ჩვენი თანამოქალაქის სიცოცხლის ფასად გვიჯდება. ყოველი დაკარგული საათი ამცირებს ვაქცინის შესაძლო რაოდენობას.
ვაქცინა და ზოგადად ადამიანის სიცოცხლე არ შეიძლება იქცეს პოლიტიკური ქიშპისა და ბრძოლის იარაღად. ეს ზეპარტიული და არაპოლიტიკური საკითხია.
ჩვენ მიგვაჩნია რომ საქართველოში არსებულმა ყველა პოლიტიკურმა ძალამ უნდა ისწავლოს და შეძლოს გაერთიანება და თანაცხოვრება, ქვეყნის და მისი მოსახლეობის უმაღლესი ინტერესის გათვალიწინებით,” – ნათქვამია გავრცელებულ განცხადებაში.
