რამდენიმე თვიანი პატიმრობის შემდეგ, ე.წ. “კარტოგრაფების საქმეზე” დაკავებული მეცნიერები – ივერი მელაშვილი და ნატალია ილიჩოვა, პროკურატურის შუამდგომლობის საფუძველზე, თბილისის საქალაქო სასამართლომ პატიმრობიდან გირაოს შეფარდებით გაათავისუფლა. მოსამართლის გადაწყვეტილებით, თითოეულს 20-20 ათასის გირაო შეეფარდათ.
პატიმრობიდან გათავისუფლებულებმა მედიასთან პირველი კომენტარები გააკეთეს:
“დიდი მადლობა ყველას მხარდაჭერისთვის! ჩატარდა პროცესი, როგორც იქნა მოხდა, რაც საზოგადოებისა და ადვოკატების დამსახურებაა, რომ პატიმრობიდან გაგვათავისუფლეს. პროცესი გაგრძელდება და იმედი მაქვს, რომ გავიმარჯვებთ.
გათავისუფლებას თან ველოდი და თან არა. საერთოდ არ იყო დაპატიმრების აბსოლუტურად არანაირი საფუძველი, ამიტომ ამათგან ყველაფერს ველოდი და კარგია, რომ გაგვიშვეს. გირაოს საერთოდ არ ვეთანხმებოდით, რადგანაც არანაირი ბრალი არ მიგვიძღვის. სასამართლომ მიიღო გადაწყვეტილება გირაოზე, არც ეს არის პრობლემა.
სახელმწიფოს გაყიდვის ბრალდება თავიდან ბოლომდე აბსურდული და უსაზიზღრესი ბრალდებაა ჩემს მიმართ და ნამდვილად პოლიტიკური ნიშნითაა ყველაფერი.
შეგნებული საზოგადოების დიდ მხარდაჭერას ვგრძნობ. საკითხი ბოლომდეა მისაყვანი. აბსურდულ ბრალდებებს ბოლო უნდა მოეღოს. არ შეიძლება ეს მარაზმი გაგრძელდეს ქვეყანაში,” – განაცხადა ივერი მელაშვილმა.
კომენტარი გააკეთა ნატალია ილიჩოვამაც, რომელიც თვლის, რომ მათი დაპატიმრება შეცდომა იყო:
“ვფიქრობთ, ყველაფერი კარგადაა. ჩვენ თავიდანვე არ უნდა დავეპატიმრებინეთ. ეს ალბათ რაღაც შეცდომა იყო,” – ნატალია ილიჩოვა.
