მოლაპარაკებების მე-5 რაუნდთან დაკავშირებით ინტერესი დიდია, თუმცა კი ჯერ-ჯერობით გაურკვეველია, თუ როდის შედგება იგი. წარმოქმნილი პაუზა შეფასებების მრავალფეროვნების მხრივ გარკვეულ მოლოდინებს ქმნის. პარლამენტის პირველ ვიცე-სპიკერს, გიორგი ვოლსკის მიაჩნია, რომ თუკი ოპოზიციას მოლაპარაკებებზე რაიმე კონსტრუქციული შემოთავაზებები არ ექნებათ, მაშინ რეალურად მოქმედებს რევოლუციური სცენარი:
“ოპოზიციურ პარტიებს, ოპოზიციურ სუბიექტებს თანხმობა ან რაიმე კონსტრუქციული შემოთავაზება თუ არ ექნებათ, ეს იქნება ლუსტრაცია და ეს არის იმის მანიშნებელი, მთელი საზოგადოებისათვის, მათ შორის, მათი მხარდამჭერებისათვისაც, რომ ადამიანები, პოლიტიკური სუბიექტები არ არიან მზად ობიექტურად შეაფასონ მიმდინარე პროცესები. აქედან გამომდინარე, რევოლუციური სცენარი მოქმედებს და კვლავ სააკაშვილის თემა რჩება მათთვის აქტუალური. საზოგადოებამ უნდა გადაწყვიტოს, თუ რომელი მხარეა მართალი,” – აცხადებს გიორგი ვოლსკი.