„ევროპული საქართველოს“ ლიდერმა, ელენე ხოშტარიამ პარტია ოფიციალურად დატოვა. გადაწყვეტილების მიღებისა და პარტიის წევრებთან კონსულტაციების შემდეგ, პოლიტიკოსმა ჟურნალისტებთან განცხადება გააკეთა და განმარტა მიზეზები, რატომაც მიიღო მან ეს გადაწყვეტილება. მისი თქმით, მას აქვს ახალი გეგმები პოლიტიკურ ცხოვრებაში, რის განხორციელებასაც დამოუკიდებლად გეგმავს:
„მინდა, დავიწყო მადლობით “ევროპული საქართველოს” მიმართ. ეს არის გუნდი, რომელშიც მე პრაქტიკულად დავიწყე პოლიტიკური ცხოვრება, რომელთან ერთადაც გავიარე ძალიან მნიშვნელოვანი პოლიტიკური ბრძოლები და ბევრი რამ შევიძინე. ამიტომ, პირველი რაც მინდა ვთქვა, ძალიან დიდი მადლობა თითოეულ ადამიანს, როგორც ამ პარტიაში, ასევე მთელი ქვეყნის მასშტაბით, ყველა იმ აქტივისტს, რომელიც ამ პარტიაში ჩვენთან ერთად იბრძოდა.
პოლიტიკური ციკლის ამ ეტაპზე მე მივიღე გადაწყვეტილება, რომ დავიწყო დამოუკიდებელი პოლიტიკური ცხოვრება. მინდა, ხაზგასმით აღვნიშნო, რომ არ გადავდივარ არც ერთ სხვა პარტიაში და ასევე ძალიან მყარად ვრჩები ოპოზიციურ ერთობაში.
ოპოზიციური ერთობა არის უძლიერესი იარაღი დღევანდელ რეჟიმთან ბრძოლის პროცესში. სათქმელიც არ არის, რომ არც კი განვიხილავ პარლამენტში შესვლის საკითხს. ჩემი პოლიტიკური პოზიციები რჩება აბსოლუტურად იგივე, უბრალოდ, მე მაქვს ახალი გეგმები პოლიტიკურ ცხოვრებაში – ახალი პლატფორმის, ახალი პოლიტიკური ძალის შექმნა.
ბიძინა ივანიშვილის რეჟიმთან ბრძოლაში მნიშვნელოვანია, როგორც წინააღმდეგობის მოძრაობა, აქტივიზმი, ასევე, მტკიცე, ერთიანი, პრინციპული და კოორდინირებული პოლიტიკური პროცესი და მე ორივე მიმართულებით ვაპირებ ბრძოლის გაგრძელებას”, – განმარტავს ელენე ხოშტარია.
„ევროპული საქართველოს“ ყოფილმა ლიდერმა პარტიის წევრებთან შეხვედრამდე კომენტარი გააკეთა, რომ აღნიშნული გადაწყვეტილება თანაგუნდელებთან კონფლიქტს არ უკავშირდება.
ავტორი
ნინი შავლაძე
