ვაზიანის სამხედრო ბაზიდან გაუჩინარებული ჯარისკაცი ნაპოვნია – შსს

146

ვაზიანის სამხედრო ბაზიდან გაუჩინარებული ჯარისკაცი, თეიმურაზ გიუნაშვილი 4 დღის ძებნის შემდეგ იპოვეს. ინფორმაციას შინაგან საქმეთა სამინისტროს უწყება ავრცელებს და აცხადებს რომ თავდაცვის სამინისტროს საკონტრაქტო მოსამსახურე თბილისში იპოვეს და ის თავს კარგად გრძნობს. რამდენიმე საათით ადრე კი თავდაცვის სამინისტრომ ვიდეომასალა და კონკრეტული ინფორმაცია გაავრცელა შესაბამის განმარტებასთან ერთად, იმის თაობაზე, რომ აღნიშნულმა პიროვნებამ განაწესის შეცვლის შემდეგ ისარგებლა კონტრაქტით გათვალისწინებული დათხოვნის უფლებით და დატოვა სამხედრო ნაწილის ტერიტორია:

 „შინაგან საქმეთა სამინისტროს ქვემო ქართლის პოლიციის დეპარტამენტის გარდაბნის რაიონული სამმართველოს თანამშრომლებმა, თავდაცვის სამინისტროს სამხედრო პოლიციასთან კოორდინაციით, ერთობლივად ჩატარებული ინტენსიური სამძებრო და საგამოძიებო მოქმედებების შედეგად, თავდაცვის სამინისტროს საკონტრაქტო სამხედრო მოსამსახურე თ.გ. თბილისში იპოვეს.

სამხედრო მოსამსახურე თ.გ. 21 დეკემბერს 09:00 სთ-მდე იმყოფებოდა განწესში და ასრულებდა დაკისრებულ მოვალეობას, ხოლო განაწესის შეცვლის შემდეგ ისარგებლა კონტრაქტით გათვალისწინებული დათხოვნის უფლებით და დატოვა სამხედრო ნაწილის ტერიტორია.

ფაქტზე გამოძიება სისხლის სამართლის კოდექსის 143-ე მუხლით მიმდინარეობს.

სამხედრო მოსამსახურე თავს კარგად გრძნობს და გამოკითხვის მიზნით პოლიციის განყოფილებაშია გადაყვანილი“, – წერია შინაგან საქმეთა სამინისტროს განცხადებაში

შეგახსენებთ, რომ გორის მუნიციპალიტეტში მცხოვრები, თეიმურაზ გიუნაშვილი, ვაზიანის სამხედრო ბაზიდან 20 დეკემბერს გაუჩინარდა და ოჯახის ინფორმაციით, ის ბაზაზე 28 დეკემბრამდე უნდა ყოფილიყო.

ავტორი
ნინი შავლაძე

კომენტარები