“როგორც პარლამენტი არის ერთპარტიული, ასევე გვეყოლება ერთპარტიული საარჩევნო ადმინისტრაცია” – ანა კობახიძე

,,სტრატეგია აღმაშენებლის“ პოლიტსაბჭოს წევრმა, პარტიის საარჩევნო და სამართლებრივი საკითხების მიმართულების ხელმძღვანელმა, ანა კობახიძემ სააგენტო ,,პარალელთან” ინტერვიუში განაცხადა, რომ როგორც პარლამენტია ერთპარტიული, იგივე შეიძლება მოხდეს საარჩევნო ადმინისტრაციასთან მიმართებაშიც. იგი, ასევე, აღნიშნავს რომ, ოპოზიციამ კონკრეტული სქემა შესთავაზა ხელისუფლებას, საარჩევნო ადმინისტრაციის დაკომპლექტებასთან დაკავშირებით, თუმცა ვარაუდობს, რომ ცესკო-საც ისეთივე ბედი ეწევა, როგორიც პარლამენტს:

• მას შემდეგ, რაც მოხდა პარლამენტის უფლებამოსილება ცნობა, დაიწყო საარჩევნო ადმინისტრაციის რეფორმირება და დაკომპლექტება, საარჩევნო კოდექსიის შესაბამისად, როგორია თქვენი შეფასება?

– მოქმედი საარჩევნო კოდექსის შესაბამისად, რადგანაც რეალურად პარლამენტი არის ერთპარტიული, ასეთივე გვეყოლება საარჩევნო ადმინისტრაციაც.

საარჩევნო კოდექსში პირდაპირ წერია: საარჩევნო კომისიაში წევრი შეიძლება ჰყავდეს იმ პარტიას, რომელიც ფრაქციას შექმნის პარლამენტში. ამ შემთხვევაში, განსაზღვრული ფორმულის შესაბამისად, გამოდის რომ ,,ქართულ ოცნებას”, ყველა დონის საარჩევნო კომისიაში, ეყოლება 3 წევრი და ასევე 3 წევრი ეყოლებოდა გაერთიანებულ ოპოზიციას “ძალა ერთობაშია”-საც, რადგანაც ცესკო-ს მიერ გამოქვეყნებული შედეგების თანახმად, მათ შეეძლებოდათ ფრაქციის შექმნა, ხოლო სხვა პოლიტიკურ სუბიექტებს არა. თუმცა, როგორც ცნობილია, ხელისუფლებასთან კონკრეტული შეთანხმების მიღწევის გარეშე, ოპოზიცია არ შედის პარლამენტში, შესაბამისად არც ფრაქციას შექმნის. აქედან გამომდინარე კომისიის წევრები არ ეყოლებათ. შესაბამისად, ადმინისტრაცია დაკომპლექტებული იქნება მხოლოდ “ქართული ოცნებისა” და ე.წ. ნეიტრალური წევრებისგან, რომელთა “ნეიტრალური” საქმიანობაც ნათლად ვიხილეთ წლების განმავლობაში.

ეს მიგვანიშნებს იმას, რომ როგორც პარლამენტი არის ერთპარტიული, ასევე გვეყოლება ერთპარტიული საარჩევნო ადმინისტრაცია. რაც სერიოზული პრობლემაა. ამის თაობაზე საუბარია ეუთო/ოდირს რეკომენდაციაში, ასევე ადგილობრივი სამთავრობო ორგანიზაციების შეფასებებსა თუ პოლიტიკური პარტიების პრეტენზიებში.

იმის გათვალისწინებით, რაც არჩევნების დროს მოხდა საარჩევნო კომისიებში და მსგავსი არ განმეორდეს, სრულიად ოპოზიციას შეთავაზებული აქვს წინადადებათა კონკრეტული პაკეტი, რომელიც მოიცავს საარჩევნო კოდექსში მნიშვნელოვან ცვლილებებს. ვიმედოვნებთ რომ, ოპოზიციის მიერ შეთავაზებული ყველა პუნქტი სრულფასოვნად და სწრაფად იქნება გათვალისწინებული და იგივე საარჩევნო ადმინისტრაცია არ დარჩება,  ზუსტად იგივე პრობლემებით, ადგილობრივი თვითმმართველობის არჩევნებზეც.

• ოპოზიცია რაში ხედავთ გამოსავალს?

– ჩვენ წარდგენილი გვაქვს შეთავაზება, რომ ადმინისტრაცია დაკომპლექტდეს ყველა იმ პარტიის წარმომადგენლებით, რომლებმაც, თუნდაც, ცესკო-ს მიერვე დათვლილი შედეგების მიხედვით გადალახეს ბარიერი. ხოლო, რაც შეეხება ნეიტრალურ წევრებს, ისინი უნდა შეირჩნენ კომპეტენტური არასამთავრობო ორგანიზაციების ჩართულობით, რომ აღარ არსებობდეს კითხვები მათ ნეიტრალურობასთან დაკავშირებით.

• თქვენი აზრით, გაითვალისწინებს თუ არა ხელისუფლება ამ შეთავაზებას?

– ხელისუფლებას მოუწევს შეთავაზების გათვალისწინება, რადგანაც დღეს მოქმედი კანონმდებლობის შესაბამისად დაკომპლექტებული საარჩევნო კომისიები ქვეყნისთვის ისეთივე დიდი უსამართლობა იქნება, როგორიც საარჩევნო ადმინისტრაცია – ერთპარტიული და ერთპარტიული პარლამენტი.

შეგახსენებთ, რომ ,,სტრატეგია აღმაშენებელმა”, სხვა ოპოზიციური პარტიების მსგავსად, ხელისუფლებასთან შეთანხმების მიღწევამდე, ბოიკოტი გამოაცხადა და უარი თქვა პარლამენტში შესვლაზე.

ავტორი
ნინი ხიჯაკაძე