საქართველოს პარლამენტის ეროვნული ბიბლიოთეკის გენერალური დირექტორი და მწერალი, გიორგი კეკელიძე სოციალურ ქსელში, ანონიმურობის დაცვით, ერთ-ერთი მკითხველის მიერ მისთვის გაგზავნილ წერილს აქვეყნებს, რომელშიც მწერალს წიგნების ჩუქებას სთხოვს, რათა მის მეუღლეს ახალ წელს სიურპრიზი გაუკეთოს.
‘‘სულისშემძვრელი წერილები კი მრავლად არის, მაგრამ დღეს ასეთიც მივიღე:
,,საღამო მშვიდობისა ბატონო გიორგი… გაწუხებთ ბოდიშის მოხდით…
მაინტერესებს, წიგნებს მხოლოდ სტიპენდიატებს ჩუქნით თუ სხვა ადამიანებსაც აქვს შანსი?
ჩემი მეუღლე არის ძალიან კარგი მკითხველი, ასევე წერს ლექსებს, ჩანახატებს…
თუმცა ამას პიარისთვის არ გწერთ…
უბრალოდ წიგნებს ვერ ვყიდულობთ, ქირით ვცხოვრობთ, ჩვენს 4 წლის გოგონასთან ერთად…
არის შემთხვევები პურის ფულით წიგნი გვეყიდოს, მაგრამ თუკი შანსი არსებობს, ახალი წელი მოდის და მინდა გავახარო ჩემი მეუღლე… არანაირ თანხას არ ვითხოვ…
თუ შესაძლებელია წიგნებს ვიჩუქებდით სიამოვნებით ნებისმიერს. მადლობა.
თქვენი მკითხველი.”
ჰოდა, განა რამე, ამ ოჯახის ბიბლიოთეკას ჩვენც გავწვდებით, უბრალოდ მინდოდა კიდევ ერთხელ შეგემჩნიათ, რომ საქართველო ასეთი ხალხიცაა, ასეთი უცნაურად მორიდებული ადამიანები. ისინი ვერასდროს მოხვდებიან რაღაც შოუ-გადაცემებში – მანერული მანჭვა არ არის მათი საქმე. და არც უნდა იყოს. რადგან ქვეყანა ასეთ ადამიანებზე იდგა. აქამდეც და ხვალაც იდგება’’ – წერს გიორგი კეკელიძე ფეისბუქ პირად გვერდზე.
ავტორი
ანა რობაქიძე
