ოპოზიციურმა პარტიებმა ხელისუფლებას და პირადად ბიძინა ივანიშვილს სამი ძირითადი მოთხოვნა წაუყენა, რომლისთვისაც 20:00 საათამდე მისცა დრო. აღნიშნულთან დაკავშირებით განცხადება ელენე ხოშტარიამ აქციაზე გააკეთა:
‘‘2020 წლის საპარლამენტო არჩევნებზე ქართველმა ხალხმა უარი უთხრა ივანიშვილის ოლიგარქიულ მმართველობას. ჩვენ, ოპოზიციური ძალები მივიჩნევთ, რომ ეს პარლამენტი არ არის ლეგიტიმური, რადგან ის არ ასახავს ხალხის ნებას. ამიტომ, ჩვენ უარს ვამბობთ საპარლამენტო მანდატებზე. ეს პოზიცია სრულად გაიზიარა ყველა პოლიტიკურმა პარტიამ, რომელიც შევიდა და ვერ შევიდა, ცესკო-ს გაყალბებული ციფრებით პარლამენტში. დაფიქსირდა უპრეცედენტო ოპოზიციური ერთიანობა.
ჩვენ, აქ შეკრებილი ადამიანები, ვითხოვთ:
- ხელახალ, თავისუფალ და სამართლიან არჩევნებს. ეს არჩევნები ვერ იქნება მიახლოებულიც კი თავისუფლებასთან, თუ არ შესრულდება მეორე მოთხოვნა;
- თამარ ჟვანია უნდა გადადგეს და კომისიები უნდა დაკომპლექტდეს სამართლიანი წესით;
- ყველა პოლიტპატიმარი უნდა იყოს გამოშვებული.
წამზომი ჩართულია, ივანიშვილს დრო აქვს 20:00 საათამდე, რომ გამოვიდეს და ჩვენს პარტნიორებთან ერთად ამ საკითხებზე ელაპარაკოს ხალხს, დაჯდეს მოლაპარაკების მაგიდასთან და გადაწყვიტოს რა უნდა – წავა თავისით, თუ მაინც მოუწევს წასვლა, იმიტომ რომ ამ ძალას ვერავინ ვერ დაუპირისპირდება’’, – განაცხადა ელენე ხოშტარიამ.
ავტორი
ანა რობაქიძე