დღეს საქართველოს ისტორიაში ერთ-ერთი მნიშვნელოვანი დღეა, ტარდება საპარლამენტო არჩევნები. მოსახლეობა, პარტიის წარმომადგენლები, მედია საშუალებებთან ერთად აკვირდებიან მიმდინარე პროცესებს. ამომრჩეველთა ხმების დაცვის ოპოზიციური შტაბი, რომელიც შექმნილია საარჩევნო პროცესების დასაკვირვებლად და დარღვევების აღმოჩენის შემთხვევაში მტკიცებულებების გამოსაქვეყნებლად მათ ოფიციალურ გვერდზე 31.ge. ამ საიტის და მედიის საშუალებით გამოაშკარავდა არაერთი დარღვევა საარჩევნო უბნებზე და მათ შორის იყო ფიზიკური ძალადობის ფაქტებიც.
ამ თემასთან დაკავშირებით და საარჩევნო პროცესის მიმდინარეობაზე სააგენტო „პარალელთან“ კომენტარი გააკეთა „სტრატეგია აღმაშენებლის“ ერთ-ერთმა ლიდერმა, სერგო ჩიხლაძე.
„ამ ეტაპისთვის არჩევნებზე ფიქსირდება მაღალი აქტივობა, მთავარია, რომ მომდევნო საათებშიც შენარჩუნდეს მოქალაქეების ჩართულობა. თუმცა, საარჩევნო უბნებზე დილიდან იყო დიდი რიგები, რაც გამოწვეული იყო არა დისტანციის დაცვით, არამედ პროცესის მართვით და ეს მიანიშნებს, იმაზე რომ საარჩევნო კომისიის წევრები არ იყვნენ სათანადოდ გადამზადებულები.
რაც შეეხება დარღვევებს, გვაქვს მოსყიდვის, ძალადობის ფაქტები, რომელსაც ესწრებიან პოლიციელები და არ რეაგირებენ განვითარებულ მოვლენებზე. მიუხედავად ამისა, ვფიქრობ ქართველი ერი გააკეთებს სწორ არჩევანს და „ქართულ ოცნებას“ გავუშვებთ ოპოზიციაში.
ჩვენი მოლოდინი არის ეს და წინასაარჩევნო კამპანიის პერიოდში, ჩვენ, მთელი საქართველოს მასშტაბით ვხვდებოდით მოსახლეობას, სადაც იგრძნობოდა განწყობა იმის, რომ ხალხს უნდა ცვლილებები, სიახლე, განვითარება, წინსვლა და აღმშენებლობა. შესაბამისად, ის 8 წელი, უკუსვლა და ჭაობი დასრულდა. რაც, ბუნებრივია უნდა შეიცვალოს სწრაფი განვითარებით და აღმშენებლობით. ჩვენ და მე პირადად ძალიან მახარებს, რომ მზარდია ჩვენი პარტიის „სტრატეგია აღმაშენებლის“ მხარდაჭერა.
ჩვენი წარმომადგენლები აქტიურად აკვირდებიან დარღვევებს. გარდა ამისა, „სტრატეგია აღმაშენებელს“ შემუშავებული აქვს ვებ პლატფორმა, სადაც ყოველ საათში პირდაპირ იტვირთება მრავალი, ათეულობით ოქმი, დარღვევის აღმნიშვნელი მასალები ვიდეო და აუდიო მტკიცებულებების სახით.
რამდენად იმოქმედებს ეს დარღვევები არჩევნების ლეგიტიმურობაზე, ამას ვნახავთ დღის ბოლოს, არ გამოვრიცხავ იმას, რომ შესაძლებელია ზოგიერთ უბანზე დაინიშნოს მეორე ტური. ყველგან, სადაც, მნიშვნელოვანი დარღვევები იყო, ჩვენ ვრეაგირებთ და ეს გაიგზავნება ცესკოში და ექნება შესაბამისი რეაგირება,” – აცხადებს სერგო ჩიხლაძე.
ავტორი
ნინი შავლაძე
