ბოლო დღეღამის განმავლობაში ქვეყანაში კოვიდინფიცირების 1192 ახალი დადასტურებული შემთხვევა გამოვლინდა, რაც დღეის კორონავირუსის საქართველოში გავრცელებიდან დღემდე ყველაზე მაღალი და საგანგაშო მაჩვენებელია. ბოლო 24 საათის განმავლობაში კორონავირუსის დიაგნოზით 8 ადამიანი გარდაიცვალა.
როგორც ინფექციურის ბოქსირებული განყოფილების ხელმძღვანელმა მარინა ენდელაძემ ჟურნალისტებს განუცხადა ქვეყანაში კორონავირუსის ახალი შემთხვევების უდიდესი ნაწილი უკვე თბილისზე მოდის – სულ 471 შემთხვევა.
“აჭარაშიც მოიმატა ახალმა დადასტურებულმა შემთხვევებმა და აღირიცხა 343; იმერეთში – 211; დანარჩენ რეგიონებში შედარებით ნაკლებია. სამეგრელო ზემო-სვანეთში – 45; შიდა ქართლში – 37; ქვემო ქართლში – 39; გურიაში – 18; სამცხე-ჯავახეთში – 14; მცხეთა-მთიანეთში – 13 და კახეთში – 11 ახალი დადასტურებული შემთხვევა.
დედაქალაქში კოვიდინფიცირებულთა მატება ისევ და ისევ უკავშირდება რეგულაციების არდაცვას. მე კიდევ ერთხელ მოვუწოდებ საზოგადოებას, თბილისელებს და საერთოდ მთელ საქართველოს, დავინდოთ საკუთარი თავი, დავინდოთ სახელმწიფო და დაგვინდეთ ჩვენც – ექიმებიც, რამეთუ ძალიან რთულ პირობებში გვიწევს მუშაობა“, – აღნიშნავს მარინა ენდელაძე.
ბოლო მონაცემები კი ქვეყნის მასშტაბით ასეთია:
- კორონავირუსის დადასტურებული შემთხვევა – 17477
- მათ შორის გამოჯანმრთელებული – 8060
- მათ შორის გარდაცვლილი – 136
- კარანტინის რეჟიმში – 6380
- სტაციონარში მეთვალყურეობის ქვეშ – 836
- კოვიდ სასტუმროში მყოფი პირები – 1420
- *უცხოეთიდან სამკურნალოდ გადმოყვანილი საქართველოს მოქალაქეები – 41
