9 ოქტომბერს, გლდანის მაჟორიტარობის კანდიდატის, ნიკა მელიას წარდგენაზე სიტყვით გამოვიდა “სტრატეგია აღმაშენებლის” თავმჯდომარე გიორგი ვაშაძე. ოპოზციონერმა ლიდერმა ერთიანობისკენ მოუწოდა ოპოზიციას და საზოგადოებას მიმართა, რომ არცერთი ხმა არ მისცეს “ქართულ ოცნებას”:
„მოგესალმებით ჩემო ძვირფასებო, მიხარია რომ ერთად ვართ, მიხარია რომ ერთად ვიბრძვით და მიხარია რომ აუცილებლად გავიმარჯვებთ!
31 ოქტომბერი, ეს არაა უბრალოდ არჩევნების დღე, ეს არის რეფერენდუმი – ან ჭაობი, ან განვითარება; ან ის უბედური ოლიგარქატი, რაც ქვეყანაშია, ან ერთად შეკრული ძლიერი, ერთიანი საქართველო, რომელიც გაიმარჯვებს ქვეყანაში არსებულ სიღარიბესა და უბედურებაზე.
31 ოქტომბერი – ეს არის ტესტი ჩვენი ქვეყნისთვის, ვიქნებით ჩვენ მსახურნი თუ ვიქნებით ამაყები, ამაყები ჩვენი ქვეყნით, ამაყები მთელ მსოფლიოში.
დიახ, ჩვენ აქ ერთად ვდგავართ და ყველაზე მაგარი არის ის, რომ ამ ერთიანობით მთელ საქართველოს, თქვენთან ერთად, მივმართავთ, რომ ერთიანობას ალტერნატივა არ აქვს, ჩვენ აუცილებლად გავიმარჯვებთ და აუცილებლად გაიმარჯვებს თითოეული ოჯახი.
8 წლის მანძილზე „დამსხრეული ოცნებების“ პარტიამ მოატყუა საქართველოს თითოეული მოქალაქე, არცერთი დაპირება მათ არ შეასრულეს, არცერთი სფერო არ არსებობს ქვეყანაში, რომელიც წინ წავიდა და დღეს ისინი ისევ ბედავენ თქვან, რომ ქვეყანაში ყველაფერი კარგადაა. ესაა ტყუილი და ამ ტყუილს 31 ოქტომბერს ყველამ ერთად უნდა გავცეთ პასუხი.
მე დღეს აქ ჩემს პარტიას „სტრატეგია აღმაშენებელს“ წარმოვადგენ, მაგრამ არ წარმოვადგენ პარტიის მაჟორიტარ კანდიდატს, ჩვენ აქ წარმოვადგენთ ნიკა მელიას. დიახ, ახალგაზრდა, ახალი თაობის, ენერგიულ, პრინციპულ, მაგარ ვაჟკაცს, რომელიც აუცილებლად გაიმარჯვებს გლდანში. და ყველა ჩვენს მხარდამჟერს მოვუწოდებთ – არცერთი ხმა „ოცნების“ სასარგებლოდ, მხოლოდ ოპოზიცია, ოპოზიცია და ოპოზიცია, რომელიც გახდება ხელისუფლება ამ ქვეყანაში,“ – განაცხადა გიორგი ვაშაძემ.