დღეს ცენტრალურ საარჩევნო კომისიაში, განიხილავდნენ თვითიზოლაციაში მყოფი მოქალაქეების ჩართულობის საკითხს არჩევნებში, სხდომა რამდენიმე საათის წინ დასრულდა.
განხილვის მთავარი საკითხი იყო ის, რომ ეპიდემიის პირობებშიც მოხერხდეს ამომრჩეველთა ხმების მიღება და ასახვა, ისე რომ არც უსაფრთხოების ნორმები დაირღვეს და არც საარჩევნო უფლებები. განხილვის თემა გახლავთ, არა მარტო ის ადამიანები, რომლებიც დამოუკიდებლად შეძლებენ საარჩევნო უბანზე მისვლას არამედ, იმ მოქალაქეებისაც, რომლებიც თვითიზოლაციაში ან საკარანტინე სივრცეებში იმყოფებიან. სწორედ მათ ჩართულობის ფორმებზე იმსჯელეს დღეს არასამთავრობოებმა და პოლიტიკურმა პარტიებმა ცესკოში, თუმცა საკითხზე ჯერ კიდევ ვერ შეჯერდნენ:
„მნიშვნელოვანია, საკარანტინო ზონებში მყოფი და კოვიდინფიცირებული პირების კონსტიტუციური უფლების განხორციელების მაქსიმალური ხელშეწყობა“, განაცხადა ცესკოს თავმჯდომარემ თამარ ჟვანიამ.
აღნიშნულ საკითხთან დაკავშირებით განცხადება გაავრცელა ცენტრალური საარჩევნო კომისიის ადმინისტრაციამ:
„საკარანტინო ზონებში მყოფი და კოვიდინფიცირებული პირების არჩევნებში მონაწილეობის საკითხზე უახლოეს დღეებში სამუშაო ჯგუფის მორიგი შეხვედრა გაიმართება, სადაც მხარეები შესაბამისი დადგენილების პროექტს დეტალურად განიხილავენ“, – ნათქვამია განცხადებაში.
თავიანთი აზრი დააფიქსირეს, აგრეთვე, როგორც პოლიტიკური ორგანიზაციების, ისე სამოქალაქო სექტორის წარმომადგენლებმაც.
“ბევრი გამოწვევაა, დაწყებული უსაფრთხოებით, დასრულებული კენჭისყრის დღესთან დაკავშირებით, შეიძლება თუ არა, რომ ასეთ უბნებზე ერთი დღით ადრე ჩატარდეს კენჭისყრა, როგორ მოხდება ხმების დათვლა. რეალურად, ბევრი საკითხია, რომელიც ღიაა ამ ეტაპისთვის და ეს არ არის მხოლოდ კომისიის წევრებთან დაკავშირებული საკითხი, ეს უკავშირდება დამკვირვებლებს, პარტიების წარმომადგენლებს, ყველა იმ პირს, ვისაც კანონიერი უფლება აქვს, იყოს უბანზე წარმოდგენილი”, – აცხადებს საქართველოს ახალგაზრდა იურისტთა ასოციაციის თავმჯდომარე სულხან სალაძე.
“ვიმსჯელეთ სხვადასხვა შესაძლებლობაზე, როგორც კარანტინში მყოფი პირებისთვის, ასევე ინფიცირებული ადამიანებისთვის. იქაც ბევრნაირი დიფერენცირება შეიძლება იყოს – ზოგი სტაციონარში მკურნალობს, ზოგიც სასტუმროში, გაბნეულები არიან მთელი ქვეყნის მასშტაბით და მათთვის ოდნავ განსხვავებული რეგულაციები შეიძლება იყოს. ზოგიერთისთვის, ალბათ, გაიხსნება სპეცუბანი, ზოგიერთ შემთხვევაში, გადასატანი ყუთის მეშვეობით მოხდება ხმის მიცემა“, – განმარტავს “საერთაშორისო გამჭვირვალობა – საქართველოს” პროგრამის მენეჯერი ლევან ნატროშვილი.
“არ არის მარტივი საკითხი, თუმცა, ყველა მიმართულებით შესაძლებელია შეიქმნას ისეთი რეგულაციები, რომელიც, ერთის მხრივ, მოახდენს საკონსტიტუციო უფლების გამოყენების უზრუნველყოფას მაქსიმალურად, როგორც კი ეს შესაძლებელია და მეორეს მხრივ, იქნება უსაფრთხოების ზომები დაცული. ამ მხრივ კონკრეტულ საკითხებზე ვისაუბრეთ, ჩვენ კიდევ შევხვდებით ამ საკითხების განსახილველად”, – აცხადებს პარლამენტის ფრაქცია “ქართული ოცნების” თავმჯდომარის მოადგილე დავით მათიკაშვილი.
ავტორი
ნუცა ჯოხაძე
