გურამ დოჩანაშვილს და COVID-19-ის წინააღმდეგ მებრძოლ 9 მედიკოსს 2020 წლის საპატიო თბილისელის წოდება მიენიჭა

52

„თბილისობა 2020“-ის საზეიმო ღონისძიება სახელმწიფო ცერემონიების სასახლის ეზოში გაიმართა. ღონისძიება მთლიანად კომპოზიტორ გია ყანჩელს ეძღვნებოდა. თბილისის მერიამ ეპიდემიოლოგიური ვითარების გამო, „თბილისობის“ ყველა ღონისძიება გაუუქმა, გარდა საპატიო თბილისელის დაჯილდოების ცერემონიისა.

2020 წლის საპატიო თბილისელის წოდება 9 მედიკოსს და ქართველ კლასიკოს მწერალს, გურამ დოჩანაშვილს მიენიჭა.

მედიკოსებს შორის არიან: დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორი – ამირან გამყრელიძე, მისი მოადგილე – პაატა იმნაძე, ინფექციური პათოლოგიების, შიდსისა და იმუნოლოგიის ცენტრის დირექტორი – თენგიზ ცერცვაძე, ამავე ცენტრის სამედიცინო დირექტორი – მარინა ეზუგბაია და ამავე ცენტრის ბოქსირებული განყოფილების ხელმძღვანელი – მარინა ენდელაძე, რესპუბლიკური საავადმყოფოს დირექტორი – ლევან გოფოძე, პირველი საუნივერსიტეტო კლინიკის დირექტორი – ლევან რატიანი, თბილისის სამედიცინო უნივერსიტეტის ინფექციურ განყოფილებათა კათედრის ხელმძღვანელი – ელზა ვაშაკიძე, აკადემიკოს ვახტანგ ბოჭორიშვილის კლინიკის გენერალური დირექტორი – დავით გადელია.

საზეიმო საღამოზე, რომელიც გია ყანჩელს მიეძღვნა, მისი უკვდავი მელოდიები შესრულდა.

ღონისძიებაში მონაწილეობდნენ ევგენი მიქელაძის სახელობის საქართველოს ეროვნული სიმფონიური ორკესტრი და მისი სამხატვრო ხელმძღვანელი – ნიკოლოზ რაჭველი, ნანი ბრეგვაძე, გიორგი ცაგარელი, ნატო მეტონიძე, ლიზა ბაგრატიონი, ეკა მამალაძე და Georgian Six.

ავტორი
საბა გოგებაშვილი

კომენტარები