შეგახსენებთ, რომ გუშინ მედიის საშუალებით, გავრცელდა ინფორმაცია ინფექციური პათოლოგიების ცენტრის ხელმძღვანელის პოსტიდან წასვლის შესახებ. გამოითქვა, ასევე, ვარაუდი ჯანდაცვის მინისტრსა და თენგიზ ცერცვაძეს შორის შესაძლო დაპირისპირებაზე. აღნიშნული უარყო ეკატერინე ტიკარაძემ და განმარტა რომ მათ შორის დაპირისპირებას ადგილი არ აქვს:
„ბატონი თენგიზ ცერცვაძე არ ტოვებს თანამდებობას და, შესაბამისად, აგრძელებს მის ღვაწლმოსილ მუშაობას. გამომდინარე იქიდან, რომ საქართველოში არის საკმაოდ კრიტიკული მდგომარეობა კოვიდთან დაკავშირებით და ბატონი თენგიზი თავისი საქმის პროფესიონალია, ის პაციენტებს და სახელმწიფოს, ასევე, მის მინისტრს არ უღალატებს“, – განმარტავს ეკატერინე ტიკარაძე.
თენგიზ ცერცვაძე აგრძელებს ჩვეულ რეჟიმში მუშაობას და დღეს, ვიზიტს გეგმავს აჭარაში, კოვიდინფექციის ეპიცენტრ რეგიონში.
აღსანიშნავია, რომ თენგიზ ცერცვაძის პოსტიდან წასვლის თაობაზე კომენტარი გააკეთა ინფექციური პათოლოგიის და შიდსის ცენტრის საზოგადოებასთან ურთიერთობის სამსახურის უფროსმა გიორგი ბერიძემ.
