დღეს ინფექციურ საავადმყოფოსთან ბრიფინგი გაიმართა, სადაც საქართველოს ჯანდაცვის მინისტრმა, ეკატერინე ტიკარაძემ, ისაუბრა რეკომენდაციების გამკაცრებაზე და ჯანდაცვის სამინისტროს მზაობაზე ინფიცირებულთა რიცხვის ზრდასთან დაკავშირებით:
„კვლავ საყურადღებო რჩება აჭარის რეგიონი, სადაც ჩვენ გვყავს 297 ინფიცირებული, თბილისში 78, იმერეთის რეგიონში – 52. სამწუხაროდ, 24 საათის განმანვლობაში გვყავს 5 გარდაცვლილი – 2 ბათუმში, 3 ქუთაისში. ერთ-ერთი არის საქართველოს მოქალაქე ოკუპირებული ტერიტორიიდან, კერძოდ ოჩამჩირედან. დღეს გვქონდა სხდომა, იმასთან დაკავშირებით, რა არის ჩვენი სამომავლო გეგმა და რისი გაუმჯობესება არის მნიშვნელოვანი.
ბატონმა ამირანმა, მოწოდებით „დარჩით სახლში“ მოსახლეობას მიმართა გაზრდილი მაჩვენებლების გამო და მეც, მოვუწოდებ ყველას, რომ აუცილებლად დავრჩეთ სახლში და გავუფრთხილდეთ ერთმანეთს, სწორედ, იქიდან გამომდინარე, რომ ჩვენ არ დავაწესოთ არანაირი შეზღუდვები. სამთავრობო გუნდს არ აქვს ეს მიზანი, გავცემთ რეკომენდაციებს, რომ გამოვიყენოთ პირბადე და დავიცვათ სოციალური დისტანცირება.
ამ ეტაპზე, არ გვაქვს სასუნთქი აპარატების დეფიციტი, მაგრამ აღსანიშნავია, რომ მნიშვნელოვნად გავაუმჯობესეთ ტექნიკური მზაობა, შევიძინეთ არაერთი საჭირო ინვენტარი. ამ ეტაპისთვის მობილიზებულია 3000-ზე მეტი საწოლი და საჭიროების შემთხვევაში, დამატებით ჩაერთვებიან კლინიკებიც“, – განაცხადა დღეს ჯანდაცვის მინისტრმა უწყებათაშორისი საკოორდინაციო საბჭოს სხდომაზე.
