მოძრაობა „შემახე ამნისტია“ პარლამენტის წინ გამართულ აქციაზე წარდგა მოთხოვნით, რომ პარლამენტმა გამოსცეს ამნისტია. ამასთან დაკავშირებით, საინფორმაციო სააგენტო “პარალელთან” კომენტარი გააკეთა აქციის ერთ-ერთმა ორგანიზატორმა, ადვოკატმა, ალექსანდრე კობაიძემ:
„ჩვენი მთავარი ამოცანაა, რომ პარლამენტმა გამოსცეს ჰუმანური აქტი, რომელსაც ჰქვია ამნისტია. 1 სექტემბერს ჩვენ შევიტანეთ ამნისტიის კანონპროექტი და ვითხოვთ, რომ ეს კანონპროექტი დამტკიცდეს.
სხვადასხვა ქვეყნებმა კორონა ვირუსის გამო დაამტკიცეს ეს ჰუმანური აქტი და ჩვენც ვერთიანდებით ამ იდეის გარშემო. იმ შემთხვევაში, თუ ჩვენს მოთხოვნებს არ მოჰყვა რეაგირება, ვაპირებთ, რომ განვაგრძოთ ისევ და ისევ, ამგვარი რეჟიმისა და ფორმატის აქციები.
ჩვენი ბრძოლა არის სამართლიანი და იმედი მაქვს, რომ ამ სამართლიან მოთხოვნას შედეგიც ექნება.
არ შეიძლება, რომ დღეს ციხე იყოს ასე ჩაკეტილი და პატიმრებს, მათ ოჯახის წევრებთან არანაირი წვდომა არ ჰქონდეთ. სამწუხაროდ, ციხე ჩაკეტილია რამდენიმე თვეა და კორონავირუსის გამო, მათ საერთოდ არ აქვთ გარე სამყაროსთან კომუნიკაცია. შესაბამისად, როგორც ჩვენმა მეზობელმა ქვეყნებმა მიიღეს ჰუმანური აქტი, ასევე, ვითხოვთ, რომ საქართველოშიც ამნისტია გამოსცენ. აღნიშნულთან დაკავშირებით, უკვე 15 დღეა დედები შიმშლობენ და ეს ბრძოლა გაგრძელდება მანამ, სანამ არ დაკმაყოფილდება კონკრეტული მოთხოვნები“, – განაცხადა ალექსანდრე კობაიძემ.
ავტორი
ემილი ფეიქრიშვილი
