საქართველოს პრემიერ-მინისტრმა, გიორგი გახარიამ მთავრობის ადმინისტრაციის სხდომაზე განაცხადა, რომ მთავრობის მიერ სწორი პოლიტიკის გატარებით შედეგად მოხერხდა დროის მოგება და დიდი რაოდენობა მოქალაქეების სიცოცხლის გადარჩენა:
„მოგეხსენებათ ჩვენ გვაქვს ინფიცირების რაოდენობის მკვეთრი ზრდა, თუმცა ეს იყო მოსალოდნელი. ჩვენ ყოველთვის აბსოლუტურად ღია და გულწრფელი ვიყავით მოქალაქეებთან, ყოველთვის ვამბობდით, რომ შეზღუდვის მოხსნას ლოგიკურად მოყვებოდა ინფიცირების რაოდენობის ზრდა. რა თქმა უნდა, მობილობის ზრდის შედეგია ის, რაც დღეს ხდება, განსაკუთრებით აჭარაში, თუმცა ყველას კარგად უნდა გვესმოდეს, რომ ეს იყო აბსოლუტურად პროგნოზირებადი და ჩვენ ამისთვის ვემზადებოდით. ჩვენ, თავიდანვე, თანმიმდევრულად განვაცხადეთ, რომ ვირუსთან ბრძოლა შედგება რამდენიმე ეტაპისგან.
რა თქმა უნდა, ჩვენი პირველი ამოცანა იყო შეკავება, რაც გულისხმობდა, ვირუსის დროში სწრაფი გავრცელების მაქსიმალურად შეკავებას, ამას თავისი ლოგიკური ახსნა ჰქონდა და ეს გახლდათ ის, რომ მაშინ, არა თუ საქართველოში, მსოფლიოში ვირუსის შესახებ ცოდნა იყო მინიმალური. აღსანიშნავია, რომ რესურსებიც იყო მინიმალური და ჩვენ გვჭირდებოდა დროის მოგება, რაც თანმიმდევრულად და ეფექტურად განვახორციელეთ, რის შედეგადაც, მოგეხსენებათ, ჩვენი ბევრი მოქალაქის სიცოცხლე გადავარჩინეთ. ეს საერთაშორისოდაც იყო აღიარებული და დღესაც აღიარებულია.
მოგეხსენებათ საქართველო „მწვანე ქვეყანა“ რჩება დღესაც, თუმცა მეორე ეტაპი, არის ადაპტაცია და ჩვენ ადაპტაციისთვის გვჭირდებოდა დრო, დღეს კი ვართ ადაპტაციის და მართვის ეტაპზე. პირველ ეტაპზე, როდესაც ჩვენი ძირითდი ამოცანა იყო ვირუსის გავრცელების შეფერხება დროში, მივიღეთ გადაწყვეტილება და ქვეყანაში იყო საგანგებო მდგომარეობა გამოცხადებული, მკვეთრად შეიზღუდა მობილობა რამაც მოგვცა შესაძლებლობა მოგვეგო დრო. ამ ხნის განმავლობაში ჩვენი ამოცანა იყო ჯანდაცვის სისტემის და ტესტირების სისტემის მომზადება, პერსონალის გადამზადება და კიდევ ბევრი სხვა მიზანი, რომელიც უნდა განგვეხორციელებინა და განვახორციელეთ.
ეკონომიკის ინტერესებიდან გამომდინარე საგანგებო მდგომარეობის და მკვეთრი შეზღუდვების დიდ ხანს გაგრძელება შეუძლებელი იყო და რა თქმა უნდა, ჩვენ ყველამ ერთად ამ შეზღუდვების ეტაპობრივი მოხსნა დავიწყეთ, რაც იყო აბსოლუტურად გამართლებული და სწორი ნაბიჯი“, – განაცხადა გიორგი გახარიამ.
ავტორი
ემილი ფეიქრიშვილი
