“დავიცვათ რეკომენდაციები და რამდენიმე დღეში ეპიდსიტუაცია აუცილებლად დასტაბილურდება” – თორნიკე რიჟვაძე

საკოორდინაციო საბჭოს სხდომაზე გამართულ ბრიფინგზე, აჭარის მთავრობის თავმჯდომარე თორნიკე რიჟვაძის განცხადებით, კორონავირუსის გავრცელების პრევენციის მხრივ აქტიურად მიმდინარეობს მუშაობა, სიტუაცია კონტროლს ექვემდებარება და თუ რეკომენდაციების სრული დაცვა მოხდება, შესაძლებელია ეპიდსიტუაციის დასტაბილურდება:

„როგორც მოგეხსენებათ, ბათუმში და მთლიანად რეგიონში, ეპიდსიტუაცია რჩება საყურადღებოდ. ახლაც მიმდინარეობს შეხვედრა, საქართველოს ჯანდაცვის მინისტრთან და დაავადებათა კონტროლის ცენტრის ხელმძღვანელთან. ჩვენ ერთად  განვიხილავთ კონკრეტულ ღონისძიებებს, რომელიც ემსახურება, ვითარების დასტაბილურებას და არსებული პაციენტების აქტიურ მართვას.

ამ პროცესებში ჩართულია ყველა უწყება და თვალყურს ვადევნებთ კონტაქტების გამოვლენას, ასევე ხდება პაციენტების აქტიური მართვა. საწოლფონდი გაზრდილია აჭარაში, შესაბამისად დღის წესრიგში კრიტიკულად არ დგას საწოლფონდის დეფიციტი. პაციენტების ნაწილი განთავსებულია კოვიდსასტუმროებში, ძირითადად ეს გახლავთ უსიმპტომო პაციენტები.

აღვნიშნავ, რომ ჩვენ საგანგებო სიტუაციების მართვის სამსახურთან ერთად აღმოფხვრილი გვაქვს  ის ხარვეზები რომლებიც არსებობდა დაყოვნების ნაწილში.

ჩვენ კონტროლი კიდევ უფრო გავაძლიერეთ, ეს ეხება როგორც კომერციულ სექტორს, ასევე – თერმოსკრინინგს, რომელიც აქტიურად ტარდება გუშინდელი დღიდან, საპოლიციო ძალებით და ეპიდემიოლოგები მხრიდან. ასევე განსაკუთრებით მნიშვნელოვანია რომ დავიცვათ რეკომენდაციები და რამდენიმე დღეში ეპიდსიტუაცია აუცილებლად დასტაბილურდება“, – განაცხადა თორნიკე რიჟვაძემ.