აჭარაში შექმნილი ეპიდემიოლოგიური მდგომარეობის გამო ნინო ნიჟარაძე და ზაალ კაპანაძე აჭარის რეგიონის სამედიცინო სექტორის წარმომადგენლებს შეხვდნენ

160

სამედიცინო და ფარმაცევტული საქმიანობის რეგულირების სააგენტოს ხელმძღვანელი ზაალ კაპანაძე და აჭარის ავტონომიური რესპუბლიკის ჯანმრთელობისა და სოციალური დაცვის მინისტრი ნინო ნიჟარაძე, აჭარის რეგიონის სამედიცინო სექტორის წარმომადგენლებს შეხვდნენ.

შეხვედრის მთავარი თემა რეგიონში არსებული ეპიდემიოლოგიური მდგომარეობა და სამედიცინო დაწესებულებებში საწოლფონდის მობილიზება იყო. საუბარი ასევე შეეხო რეგიონში არსებული კლინიკების გარკვეული ნაწილის კოვიდცენტრებად გადაკეთებას, რათა ინფიცირებული პაციენტების დახმარება დროულად განხორციელდეს.

შეხვედრაზე მიღებული იქნა გადაწყვეტილება, დამატებით 300 საწოლის გამოყოფის თაობაზე. ჯამში, აჭარის რეგიონში, სამედიცინო დაწესებულებებში სულ 600 საწოლი იქნება მობილიზებული.

საუბარი იყო იმ საწოლფონდზე, რომელიც რეალურად გვაქვს, მოსალოდნელ კრიზისზე  და  პროგნოზულ რაოდენობაზე, რაც, შესაძლოა, საჭირო გახდეს მომდევნო ეპიდდაძაბული სიტუაციის დროს. აღნიშნულთან დაკავშირებით, კლინიკებისგან მოვისმინეთ მათი მზაობა და აზრი. შევთანხმდით საწოლების დამატებაზე, ასევე კლინიკების კოვიდცენტრებად გადამზადებასა და მაქსიმალურ ჩართულობაზე,“ – აცხადებს ნინო ნიჟარაძე.

აღნიშნულთან დაკავშირებით კომენტარი გააკეთა ზაალ კაპანაძემაც:

გავესაუბრეთ ჰოსპიტალურ სექტორს. როგორც მოგეხსენებათ, მთავრობამ ჯანდაცვის სამინისტროს დაავალა დაახლოებით 3 000 საწოლამდე საწოლფონდის მობილიზება. შესაბამისად, ეს საკითხი გავიარეთ და მათ სრული მზაობა გამოთქვეს,“ – განაცხადა ზაალ კაპანაძემ.

აღსანიშნია, რომ ქვეყანაში გამოვლენილი 152 კოვიდ-19-ის შემთხვევიდან 88 სწორედ აჭარის რეგიონში დასტურდება.

კომენტარები