ქუთაისის 32-ე საჯარო სკოლაში “კოვიდ 19”-ზე ჩატარებული ტესტირების შედეგად 19 ადამიანს კორონავირუსი დაუდასტურდა. ინფიცირებულთა შორის არიან სკოლის დირექტორი, დირექტორის მოადგილე და პედაგოგები.
დღის განმავლობაში, ქუთაისში ვირუსით დაინფიცირების 21 ახალი შემთხვევა დაფიქსირდა. მათ შორის ორი, ქალაქში მოწყობილ კარავში გამოვლინდა, თუმცა ეს შემთხვევებიც ე.წ. “სკოლის კლასტერთანაა” დაკავშირებული.
აღნიშნულ ფაქტზე კომენტარი გააკეთა დაავადებათა კონტროლის იმერეთის სამმართველოს უფროსმა:
“იმერეთის სამმართველოს ლაბორატორიაში გუშინ სულ 1167 ნიმუშის ტესტირება ჩატარდა. აქედან 460-ზე მეტი ცაგერის კლასტერიდან იყო აღებული. დღის განმავლობაში, კორონავირუსის 21 შემთხვევა დაფიქსირდა, თუმცა, საბედნიეროდ, არცერთი მათგანი არაა ჩვენთვის უცნობი ახალი კლასტერი. ფაქტები დაკავშირებულია უკვე არსებული შემთხვევების მეორეულ ან მესამეულ გადაცემებთან. ტესტირება დღეს დილას დასრულდა, ამ ეტაპზე ვმუშაობთ ეპიდკვლევის მიმართულებით,” – განაცხადა გოჩა გიორგაძემ.