„ქართული ოცნების“ აღმასრულებელი მდივანი, ირაკლი კობახიძე აცხადებს, რომ მნიშვნელოვანია არჩევნები ჩატარდეს მშვიდ, სამართლიან და თავისუფალ პირობებში. ირაკლი კობახიძემ ბრიფინგზე განაცხადა, რომ ,,ქართული ოცნება“ სტაბილურად მაღალი და მზარდი რეიტინგით გამოირჩევა, რაც იძლევა ნდობის ძლიერ მანდატს, რომ 31 ოქტომბერს საქართველოს პარლამენტში მყარ უმრავლესობას შექმნის:
,,დღეს ოფიციალურად დაიწყო ,,ქართული ოცნების“, როგორც მმართველი პარტიის საარჩევნო კამპანია. ჩვენ ყველაფერს გავაკეთებთ, რომ არჩევნები თავისუფალ, მშვიდ და სამართლიან პირობებში ჩატარდეს, რასაც ხელს შეუწყობს ჩვენ მიერ რეფორმირებული საარჩევნო კოდექსი, რომელიც ეუთოს მოდელის შესაბამისად თვისებრივად განახლდა და დაიხვეწა.
,,ქართული ოცნება“ უკვე რამდენიმე კვირაა საარჩევნო კამპანიის პროცესშია. ჩვენი პარტია აგიტაციას საუკეთესო ევროპული პრაქტიკის შესაბამისად აწარმოებს. ჩვენი ლიდერები, კანდიდატები და აქტივისტები, ამომრჩევლებს ქალაქებსა და სოფლებში ესაუბრებიან იმაზე, თუ როგორ ხედავენ რეგიონისა და ქვეყნის წინსვლასა თუ განვითარებას.
მოვუწოდებთ სხვა პოლიტიკურ პარტიებს, მაღალი პასუხისმგებლობით აწარმოონ თავიანთი წინა საარჩევნო კამპანია და ,,ქართული ოცნების“ მსგავსად, თავისუფალი, სამართლიანი და მშვიდი არჩევნების ჩატარებაში წვლილი შეიტანონ. პარტიას აქვს სტაბილურად მაღალი და მზარდი რეიტინგი, რაც გვაძლევს ძლიერ ნდობის მანდატს საზოგადოების მხრიდან, რომ კიდევ ერთხელ 31 ოქტომბერს, შექმნის მყარ უმრავლესობას საქართველოს პარლამენტში. ,,ქართული ოცნების“ დამაჯერებელი გამარჯვება არის აუცილებელი პირობა საქართველოს წინსვლისა და განვითარებისთვის,“ – განაცხადა ირაკლი კობახიძემ.
ავტორი
ნინი ხიჯაკაძე
