პირველი საუნივერსიტეტო კლინიკის გენერალური დირექტორის, ლევან რატიანის განცხადებით, შატილის ტრაგედიისას დაშავებული პაციენტების მდგომარეობა მძიმეა. სამივე პაციენტი რეანიმაციულ განყოფილებაში, მართვით სუნთქვაზე რჩება. აგრეთვე, ლევან რატიანის თქმით, ნევროლოგიური სტატუსის მხრივ, პაციენტებთან აღინიშნება დადებითი დინამიკა და სტაბილურობა:
“იცით, რომ ჩატარდა ყველა საჭირო კვლევა და გამოკვლევა. კლინიკურად დაისვა დიაგნოზები სამივესთან იდენტური – ეს არის პოლიტრავმის შედეგად განვითარებული ტრავმულ-გემორაგიული შოკი, ძილიანობა, სუნთქვის უკმარისობა და ა.შ.
ორ პაციენტთან ჩატარდა ინტერვენციული ოპერაცია. აქედან გამომდინარე, ლიკვიდირებულ იქნა პოლიტრავმის შედეგად გამოწვეული ტრავმული დაზიანება. ამ ეტაპზე, მინდა გითხრათ, რომ პაციენტების ზოგადი მდგომარეობა რჩება სტაბილური.
ნევროლოგიური სტატუსის მხრივ, პაციენტებთან დადებით დინამიკას მივაღწიეთ. ჩატარებული კლინიკურ-ლაბორატორიული კვლევების შედეგად, არც ერთთან ამ ეტაპამდე, უარყოფითი დინამიკა არ ვლინდება. ვიმედოვნებთ და ყველაფერს ვაკეთებთ იმისათვის, რომ ამ რთულ გზაზე, რაც მათ უნდა გაიარონ გამოჯანმრთელებამდე, არანაირი პრობლემა არ შეექმნათ და ყველაფერს ვაკეთებთ იმისათვის, რომ პაციენტები გამოჯანმრთელდნენ,“ – განაცხადა ლევან რატიანმა.
ცნობისთვის, 23 აგვისტოს, შატილის გზაზე მომხდარ ავტოკატასტროფას 17 ადამიანის სიცოცხლე ემსხვერპლა, 3 კი მძიმედ დაშავდა.
ავტორი
თამუნა მახარაშვილი
