საქართველოს ნავთობისა და გაზის კორპორაცია თავის ოფიციალურ ფეისბუქ გვერდზე აქვეყნებს ინფორმაციას, რომ 2019 წელს მიღებული გადაწყვეტილების შესაბამისად, გარდაბნის მუნიციპალიტეტში იგეგმება მესამე თბოელექტროსადგურის აშენება და აღნიშნულთან დაკავშირებით გამოცხადდა საერთაშორისო ფასთა გამოკითხვა. აქვე, კორპორაციიის განმარტებით, კონტრაქტორი კომპანია ვალდებული იქნება „გარდაბანი 3“-ის მშენებლობის პროცესისათვის საჭირო პერსონალის 50% საქართველოს მოქალაქეებით დაკომპლექტდეს:
„საქართველოს ნავთობისა და გაზის კორპორაცია კიდევ ერთი, რიგით მესამე, გაზის კომბინირებული ციკლის თბოელექტროსადგური „გარდაბანი 3“-ის ასაშენებლად საერთაშორისო ფასთა გამოკითხვას აცხადებს.
გარდაბნის მუნიციპალიტეტში 272 მგვტ სიმძლავრის ბუნებრივ გაზზე მომუშავე მესამე კომბინირებული ციკლის თბოსადგურის მშენებლობის შესახებ გადაწყვეტილება 2019 წელს იქნა მიღებული და მისი ექსპლუატაციაში შესვლა 2023 წლისთვის იგეგმება.
ახალი თბოელექტროსადგური კორპორაციის კუთვნილ მიწაზე, უკვე არსებული თბოსადგურების „გარდაბანი 1“ და “გარდაბანი 2“ მიმდებარედ აშენდება. კონტრაქტორი კომპანია ვალდებულია მშენებლობის პროცესისთვის საჭირო პერსონალის მინიმუმ 50% საქართველოს მოქალაქეებით დააკომპლექტოს.
ახალი თბოელექტროსადგურის მშენებლობა სტრატეგიული მნიშვნელობის პროექტია, რომელიც უფრო საიმედოს გახდის ენერგოსისტემის ფუნქციონირებას: მნიშვნელოვნად გააუმჯობესებს ქვეყნის ენერგოუსაფრთხოებას და შეამცირებს იმპორტირებულ ელექტროენერგიაზე დამოკიდებულებას,“ – ნათქვამია საქართველოს ნავთობისა და გაზის კორპორაციის განცხადებაში.
ავტორი
თამუნა მახარაშვილი
