ხელისუფლების მიერ გუშინ დაანონსებულ დახმარების გაზრდას, ონკოპაციენტებისთვის, ეხმაურება პოლიტიკური პლატფორმა “სტრატეგია აღმაშენებლის” ლიდერი გიორგი ვაშაძე და აცხადებს, რომ თუ ახლა არის შესაძლებელი უმძიმესი ფინანსურ-ეკონომიკური კრიზისის დროს გამონახულიყო ფინანსები ონკოლოგიური დაავადებების სრულად დაფინანსებისთვის, ეს რატომ არ გაკეთდა აქამდე?ოპოზიციონერი ლიდერი ასევე განმარტავს, რომ თითქმის ერთი წელია ქართველ და უცხოელ ექსპერტებთან, სამედიცინო დარგის სპეციალისტებთან ერთად სწორედ ამ საკითხზე საუბრობს და მათმა საერთო ძალისხმევამ შედეგი გამოიღო და ონკოლოგიური დაავადებების მკურნალობა სრულად დაფინანსდება.
გიორგი ვაშაძე ხელისუფლებას მოუწოდებს დროულად ჩაუშვან მათ მიერ გაგზავნილი სტრატეგია ონკოლოგიური დაავადებების პრევენციის მიზნით, რომ დროულად გამოავლინონ დაავადებები და გადაარჩინონ რაც შეიძლება მეტი სიცოცხლე:
„ჩვენმა საერთო ძალისხმევამ შედეგი გამოიღო და “დამსხვრეული ოცნებების” ხელისუფლებამ, როგორც იქნა მიიღო გადაწყვეტილება, რომ ონკოლოგიური დაავადებების მკურნალობა სრულად დააფინანსონ.
ჩვენ დეტალები არ ვიცით, მაგრამ დეტალურ მონიტორინგს გავაკეთებთ. მთავარი კითხვა, რაც ისმის ჩვენგან, თუ ახლა შესაძლებელია უმძიმესი ფინანსურ-ეკონომიკური კრიზისის დროს გამონახულიყო ფინანსები ონკოლოგიური დაავადებების სრულად დაფინანსებისთვის, ეს რატომ არ გაკეთდა აქამდე? თითქმის ერთი წელია ქართველ და უცხოელ ექსპერტებთან, სამედიცინო დარგის სპეციალისტებთან ერთად სწორედ ამ საკითხზე ვსაუბრობ და სწორედ ამაზე ვმუშაობთ დღე და ღამე.
რამდენი ოჯახის ფინანსური მდგომარეობის გაუმჯობესება იქნებოდა შესაძლებელი და რაც მთავარია რამდენი სიცოცხლის გადარჩენა იქნებოდა შესაძლებელი, რომ ეს მართლაც დროულად განხორციელებულიყო.
მსურს დიდი მადლობა გადავუხადო ყველა ექიმს, სამედიცინო დარგის სპეციალისტს, აბსოლუტურად ყველა ადამიანს, ვინც ჩართული იყო ჩვენს კამპანიაში იმ დიდი საქმისთვის, რაც ჩვენ ყველამ ერთად გავაკეთეთ. რაც ყველაზე მნიშვნელოვანია – მე მსურს დიდი მადლობა გადავუხადო ათასობით ადამიანს, რომელმაც ხელი მოაწერა პეტიციას და ეს მოთხოვნა გაუშვა მთავრობისკენ.
ჩვენ პირველ შედეგზე გავედით, მაგრამ ეს საკმარისი არ არის. თუ აკეთებთ, გააკეთეთ სრულად! ონკოლოგიის მართვის ცენტრთან ერთად ჩვენ მოგეცით დეტალური სტრატეგია ქვეყანაში ონკოლოგიურ დაავადებებზე მკურნალობის მართვასთან დაკავშირებით, რაც მთავარია ადრეული დიაგნოსტიკა, ადრეული დიაგნოსტიკა და კიდევ ერთხელ ადრეული დიაგნოსტიკა, სკრინინგი მთელი საქართველოს მასშტაბით. ჩაუშვით ეს პროგრამა რაც შეიძლება სწრაფად იმისათვის, რომ კიდევ მეტი სიცოცხლე გადავარჩინოთ და დროულად გამოვავლინოთ დაავადებები“, – განაცხადა გიორგი ვაშაძემ.
ავტორი
თამთა ასლანიშვილი