მინსკში, ალექსანდრ ლუკაშენკოს რეჟიმის წინააღმდეგ ბრძოლას 19 წლის ახალგაზრდას სიცოცხლე ემსხვერპლა. ამის შესახებ ინფორმაციას პორტალი “ბელორუსული ამბები” ავრცელებს. ფაქტს ადასტურებენ შინაგან საქმეთა სამინისტროშიც, სადაც ასახელებენ ვერსიას, რომ მოზარდი სპეცრაზმელს გაურბოდა რა დროსაც მას მანქანა დაეჯახა.
უწყების ცნობით, აღნიშნული შემთხვევა 16 აგვისტოს მოხდა. ბელარუსში გამართულ დემონსტრაციებს პირველი მსხვერპლი 11 აგვისტოს მოჰყვა, როდესაც სპეცრაზმსა და პოლიციას შორის შეტაკება მოხდა. მეორე ადამიანი 13 აგვისტოს გარდაიცვალა, ის ქალაქ გომელში დაიღუპა. არსებული ინფორმაციით, 25 წლის ახალგაზრდა პოლიციის მიერ მომიტინგეების დაკავების დროს დაიღუპა. მან რამდენიმე საათი ჩაკეტილ მანქანაში გაატარა.
შეგახსენებთ, რომ მასობრივი სახალხო პროტესტი ბელარუსში 9 აგვისტოდან უწყვეტად მიმდინარეობს.
მოქალაქეები არჩევნებში ქვეყნის ამჟამინდელი პრეზიდენტის, ალექსანდრ ლუკაშენკოს გამარჯვებას აპროტესტებენ და უნდობლობას უცხადებენ “ცესკოს”, რომლის მონაცემების თანახმადაც, ლუკაშენკომ ხმების 80% მიიღო.
