დღეს დილით აფეთქება მოხდა დიდუბეში, ტრანსპორტის ქუჩაზე, მეტრო “დიდუბის” მიმდებარე ტერიტორიაზე.
შემთხვევის შედეგად ორი ადამიანი დაშავდა მათგან ერთის 68 წლის ქალის მდგომარეობა მძიმეა, ხოლო მეორე 29 წლის მამაკაცის შედარებით სტაბილურია.
“სავარაუდოდ, ბუნებრივი აირის აფეთქების შედეგად შემოყვანილია 68 წლის ქალბატონი, რომელსაც სხეულის 25%-ის დამწვრობა აღენიშნება, დამწვრობა გვაქვს სახეზე, ორივე ზემო კიდურზე ცირკულარულად, მოთავსებულია რეანიმაციაში.
მეორე მამაკაცია 29 წლის, დამწვარია სახე და მტევნები, სხეულის 13%-ის დამწვრობით,” – განაცხადეს ხეჩინაშვილის სახელობის საუნივერსიტეტო კლინიკაში.
აღნიშნულ ფაქტს გამოემხაურა “თბილისი ენერჯიც”, რომელიც აფეთქების ერთ-ერთ მიზეზად ბუნებრივი აირის გაჟონვას ასახელებს.
“დიდუბეში მდებარე საცხობში აფეთქება, სავარაუდოდ, გაუფრთხილებლობის გამო მოხდა.
აფეთქებას ნგრევა და მსხვერპლი არ მოჰყოლია. საცხობის ორმა თანამშრომელმა საშუალო სიმძიმის დამწვრობა მიიღო და ისინი კლინიკაში გადაიყვანეს.
მომხდარის ზუსტ მიზეზებს გამოძიება დაადგენს. თუმცა, წინასწარი ინფორმაციით, საცხობში ბუნებრივი აირი დარჩათ მოშვებული, რამაც მისი დაგროვება და შემდეგ აფეთქება გამოწვია,” – ნათქვამია “თბილისი ენერჯის” მიერ გავრცელებულ განცხადებაში
მომხდარზე გამოძიება 240-ე მუხლის პირველი ნაწილით მიმდინარეობს, რაც სამეწარმეო სამუშაოების დარღვევით განხორციელებას ნიშნავს, რამაც ადამიანების მძიმე დაზიანება გამოიწვია.
ავტორი
მახო ზავრაშვილი