“ახალი საქართველოს” სათათბიროს წევრი, “დმანისის გადარჩენის ფონდის” ხელმძღვანელი თამთა შამათავა დედაქალაქში ჰაერის დაბინძურების პრობლემას ეხმაურება, მისი ორგანიზებით აქცია-პერფომანსი გაიმართა მერიასთან და არსებულ პრობლემებთან დაკავშირებით წერილობით მიმართა თბილისის მერს კახა კალაძეს:
“ბატონო კახა, როგორც მოგეხსენებათ, ჰაერის დაბინძურება ერთ-ერთ მთავარ პრობლემად სახელდება დედაქალაქში. ჯანდაცვის მსოფლიო ორგანიზაციის კვლევის თანახმად, თბილისი მესამე ადგილზეა ევროპის ყველაზე დაბინძურებულ ქალაქებს შორის. თბილისის მაცხოვრებლებს რომ ეს პრობლემა განსაკუთრებით აწუხებთ, ეს ყველა გამოკითხვაში დასტურდება და მათ შორის NDI-ის ბოლო კვლევაშიც გამოჩნდა.
იმ ფონზე, როცა ყველა თანხმდება, რომ ვცხოვრობთ ქალაქში, რომლის ჰაერიც კლავს, საჭიროა გადაიდგას კონკრეტული ქმედითი ნაბიჯები. დაბინძურების გამომწვევ უმთავრეს მიზეზად სახელდება გამონაბოლქვი და საგანგაშოდ მცირე რეკრეაციული სივრცე.
მინდა გაცნობოთ, რომ მთელი ქალაქის მასშტაბით ხეები, რომლებიც ჯერ კიდევ შემორჩნენ და მშენებლობებს გადაურჩნენ, დაავადებულია და უმეტესი მათგანი უკვე მოსაჭრელია. ადვილი წარმოსადგენია, მოჭრილი ათიათასობით ხე რა უარყოფით ეფექტს მოგვცემს ქალაქში, სადაც ისედაც საგანგაშო მდგომარეობაა, ამ მხრივ.
ფაქტია, რომ ბიუჯეტიდან გამოყოფილია თანხები როგორც გამწვანებისთვის, ასევე ფიტო-სანიტარული ღონისძიებებისთვის, რომელიც, როგორც ჩანს, არ ტარდება. მოუვლელობის და აღნიშნული ღონისძიებების არგატარების გამო, დაავადება მოედო მასიურად ჯანსაღ ხეებსაც და სახეზეა სავალალო შედეგი. გთხოვთ, განგვიმარტოთ რაში იხარჯება ეს თანხები. გვაქვს ეჭვი, რომ სახეზეა სამსახურეობრივი გულგრილობა ან არაეფექტური მენეჯმენტი.
გვესმის, რომ ჰაერის დაბინძურება კომპლექსური პრობლემაა და შესაბამისად კომპლექურ მიდგომასაც საჭიროებს, კონკრეტული სამოქმედო გეგმით და სტრატეგიით. თუმცა, მსგავსი დოკუმენტის არსებობაც კითხვის ნიშნის ქვეშ დგას. რა ბედი ელის ქალაქს, სადაც ჰაერის დაბინძურება ნორმას 300%-ით აჭარბებს? სად ვიქნებით 2020 ან 2025-ში?
აღნიშნულიდან გამომდინარე, გთხოვთ, გამოყოთ დრო შეხვედრისთვის და გაგვცეთ დაგროვილ კითხვებზე პასუხები”.
