შინაგან საქმეთა სამინისტრო თამარ ბაჩალიაშვილის ბურუსით მოცულ გარდაცვალებაზე ახალ ინფორმაციას ავრცელებს. უწყების მიერ გავრცელებულ განცხადებაში მოყვანილია კონკრეტული ინფორმაციები, რომლებიც გარდაცვლილის კომპიუტერიდან იქნა ამოღებული. განცხადებაში საუბარია, თუ როგორ ეძებდა ბაჩალიაშვილი ინფორმაციებს იმის შესახებ რა შეიძლება მოსვლოდა მის ფეისბუქ ანგარიშს, მისი გარდაცვალების შემთხვევაში. ასევე ამოღებულია საძიებო სისტემიდან ციტატა “საუკეთესო გზები თვითმკვლელობისთვის” და ა.შ.
“გვსურს საზოგადოებას მივაწოდოთ შუალედური ინფორმაცია თამარ ბაჩალიაშვილის საქმის გამოძიების მიმდინარეობასთან დაკავშირებით.
სსიპ „ლევან სამხარაულის სახელობის სასამართლო ექსპერტიზის ეროვნული ბიუროდან“, 2020 წლის 05 აგვისტოს მიღებული იქნა კომპიუტერული ექსპერტიზის დასკვნა, რომლის მიმდინარეობაშიც მონაწილეობდა ოჯახის ადვოკატი. ექსპერტიზის დასკვნის თანახმად, თამარ ბაჩალიაშვილის კუთვნილი „ეფლის“ მარკის პორტატული კომპიუტერის მეხსიერებაში აღმოჩენილი იქნა ფოტო-ვიდეო ფაილები და კომპიუტერის მეხსიერებაში ვებგვერდებზე შესვლის ისტორია.
ექსპერტიზის დასკვნის და დათვალიერების ოქმის თანახმად, 2020 წლის 17 ივლისს, გაუჩინარების წინა დღეს 18:36 საათზე თამარ ბაჩალიაშვილი შესულია „ფეისბუქის“ გვერდის დახმარების განყოფილებაში, სადაც მითითებულია არის ვებ გვერდის სათაური – What will happen to my Facebook account if I pass away?, რაც ქართულად ნიშნავს – რა მოუვა ჩემს ფეისბუქის ანგარიშს თუ მე გარდავიცვლები? ამავე წუთზე გუგლში თამარ ბაჩალიაშვილის მიერ ჩაწერილი და მოძებნილია შემდეგი ტექსტი facebook cancel account after death – რაც ნიშნავს: ფეისბუქის ანგარიშის გაუქმება სიკვდილის შემდეგ.
2020 წლის 18 ივნისს, გაუჩინარებამდე ერთი თვით ადრე- 00:16:37 საათზე თამარ ბაჩალიაშვილის მიერ გუგლის საძიებო სისტემაში ჩაწერილია სიტყვები: best ways for suicide – რაც ქართულად ნიშნავს: საუკეთესო გზები თვითმკვლელობისთვის.
იმავე დღის 00:15:51 საათზე იგი შესულია საინფორმაციო ხასიათის ვებგვერდ ვიკიპედიაზე – გვერდზე მიწერილი აქვს სათაური – Suicide methods – Wikipedia, რაც ქართულად ნიშნავს: თვითმკვლელობის მეთოდები, აღნიშნული ლინკის გახსნის შედეგად იხსნება ვიკიპედიის სტატია სათაურით: Suicide methods, სადაც მოცემულია ინგლისურ ენაზე სტატია, რომელშიც აღწერილია თვითმკვლელობის სხვადასხვა მეთოდები.
დასკვნის მიხედვით, ვებგვერდებზე შესვლის ისტორიიდან და 2020 წლის 22 ივლისს ჩატარებული თამარ ბაჩალიაშვილის ავტომანქანის დათვალიერების ოქმიდან ირკვევა, რომ ავტომანქანაში აღმოჩენილი მედიკამენტები და 2020 წლის 17 ივლისს, გაუჩინარების წინა დღეს, GOOGLE-ის საძიებო სისტემაში მის მიერ მოძიებული მედიკამენტების ნაწილი ემთხვევა ერთმანეთს.
აქვე გაცნობებთ, რომ კომპანია, სადაც თამარ ბაჩალიაშვილი მუშაობდა, შპს „ზეგ“ დარეგისტრირდა 2015 წლის 30 დეკემბერს. დირექტორი თამარ კობერიძე. საწყის ეტაპზე 100%-იანი წილის მესაკუთრე იყო ნიკოლოზ გეჯაძე, ხოლო 2018 წლის 30 იანვრიდან 100%-იანი წილის მესაკუთრეა აბრაჰამ რაიხბახი.
ამ ეტაპზე დგინდება, რომ კომპანია „ზეგ“ არ ოპერირებს საქართველოში და მისი საქმიანობა დაკავშირებულია საერთაშორისო შეკვეთებთან. კომპანიის საქმიანობის შესწავლის მიზნით გრძელდება საგამოძიებო მოქმედებები. თამარ ბაჩალიაშვილის საქმეზე ინტენსიურად გრძელდება გამოძიება, მიმდინარეობს ექსპერტიზები. სამინისტრო აქტიურ კომუნიკაციაშია ოჯახთან. აღნიშნულ საქმესთან დაკავშირებით პერიოდულად მოხდება საზოგადოების ინფორმირება.
მაღალი საზოგადოებრივი ინტერესებიდან გამომდინარე, ვასაჯაროებთ თამარ ბაჩალიაშვილის კომპიუტერიდან ამოღებული ინფორმაციის ნაწილს,” – ვკითხულობთ საგამოძიებო უწყების მიერ გავრცელებულ განცხადებაში.
ასევე, დღეს მთავარ პროკურატურასთან აქცია გამართეს გარდაცვლილი თამარ ბაჩალიაშვილის ოჯახის წევრებმა და ადვოკატმა. აქციაზე 23 წლის პროგრამისტის დედამ განაცხადა, რომ იწყებს შიმშილობას რადგან გამოძიებას არ ენდობა:
“ამათ გამოძიებას არ ვენდობი… არაფრის არ მჯერა,” – ამბობს თეონა თამაზაშვილი.
მთავარ პროკურატურასთან გამართულ აქციაზე იმყოფებოდა გარდაცვლილი პროგრამისტის ოჯახის ადვოკატი მიხეილ რამიშვილი, რომელმაც განაცხადა, რომ საგამოძიებო უწყებები მხოლოდ თვითმკვლელობაზე ავრცელებნ ინფორმაციას და მკვლელებს ხელს აფარებენ:
“გუშინ საღამოს ორგანიზებულად დაიწყეს იმ ინფორმაციის გავრცელება თითქოსდა, ისეთ ვებსაიტებზე შედიოდა, სადაც იყო ნათქვამი “მე რომ მოვკვდები, რა დაემართება ჩემს “ფეისბუქს” – ყველას გვაქვს ეს ნანახი – “მე რომ მოვკვდები, როგორი იქნება ჩემი ცხოვრება… მთელს ლეპტოპში ინფორმაცია წაშლილია და ამათ ის აქვთ გადაწყვეტილი, რომ საქმე არ გამოიძიონ, მათი ქმედებები ამყარებს იმ ინფორმაციას, რომ ხელს აფარებენ მკვლელობას და იმ ჯგუფს, რომელმაც მკვლელობა ჩაიდინეს. პირდაპირ აქვთ გადაწყვეტილება მიღებული, რომ თვითმკვლელობის იქეთ არაფერს არ გამოიძიებენ“, – განაცხადა ადვოკატმა.
ავტორი
მახო ზავრაშვილი
