„სტრატეგია აღმაშენებლის“ ლიდერის გიორგი ვაშაძის განცხადებით ქვეყანა უმძიმეს მდგომარეობაშია, ამიტომ არცერთ პოლიტიკურ ლიდერს არ აქვს უფლება დაუსაბუთებლად ერთმანეთს ტალახი ესროლონ. ოპოზიციონერმა ლიდერმა ასევე საქართველოს მესამე პრეზიდენტს მიხეილ სააკაშვილს მიმართა და განმარტა რომ დაპირისპირებას არ აპირებს და ერთიან ფრონტს აქვს მნიშვნელობა, რომ ივანიშვილი და დამსხვრეული ოცნებების პარტია დაამარცხონ.
„დღეს ქვეყანა მართლაც უმძიმეს ვითარებაშია, მილიონზე მეტი ადამიანი მშიერია და ყოველდღიურად იბრძვის, რომ ელემენტარული ლუკმა-პური მოიპოვოს, შესაბამისად ვფიქრობ, რომ არცერთ პოლიტიკურ ლიდერს არ გვაქვს უფლება დაუსაბუთებლად ერთმანეთს ტალახი ვესროლოთ, ერთი კვირის წინ ჩვენ დავაფუძნეთ „სტრატეგია აღმაშენებელი“ და დავიწყეთ კამპანია იმ მიზნით, რომ დავიწყოთ აღმშენებლობის პროცესი და დავამარცხოთ სიღარიბე ქვეყანაში.
დიახ, ვაპირებ გავხდე ამ ქვეყნის პრემიერ-მინისტრი ერთადერთი მიზნისთვის, რომ არცერთ ადამიანს ნაგავსაყრელზე არ უწევდეს ლუკმა-პურის ძიება და ამისათვის ვაპირებთ, რომ მთელი საქართველო შემოვიაროთ და დღესაც ჩამოვედი აჭარიდან, სადაც ძალიან ბევრ და საინტერესო ადამიანს შევხვდით. სწორედ ამიტომ, ვფიქრობ, რომ ის კონკრეტული სტრატეგია, რაც ჩვენ წარვადგინეთ არის აღმშენებლობის სტრატეგია, რომელიც ქვეყანას უმძიმესი კრიზისიდან გამოიყვანს.
ძალა ერთობაშია და არა ერთმანეთისთვის ტალახის სროლაში. მე რა თქმა უნდა, მოვისმინე მიხეილ სააკაშვილის განცხადება და მსურს მივმართო მას, რომ ჩვენ წარსულით კი არ უნდა ვიბრძოლოთ და წარსულში კი არ უნდა ვიყოთ, არამედ მომავალზე, ერთიანობაზე და ერთიან ფრონტზე უნდა ვიფიქროთ, რაც ძალიან მნიშვნელოვანია ქვეყნის განვითარებისთვის, ვფიქრობ 8-წლიანმა გამოცდილებამ ჩვენ ძალიან კონკრეტულად დაგვანახა, რომ ერთპარტიულ ან პარტიულ ინტერესს კი არ აქვს მნიშვნელობა, არამედ ხალხის ინტერესს აქვს მნიშვნელობა და ჩვენი მორალური კომპასიც ეს არის, რომ ჩვენ ვართ ნათელ მხარეს და დავამარცხებთ იმ ბნელ მხარეს, რომელიც დამსხვრეული ოცნებების პარტიამ საქართველოში შემოიტანა.
გამარჯვებისთვის და ქვეყანაში სწრაფი ცვლილებებისთვის ჩვენ გვჭირდება, არა ერთპიროვნული ან ერთპარტიული სისტემა, ამით ვერ დავამარცხებთ ჩვენ იმ დამსხვრეული ოცნებების პარტიას, რომელმაც უმძიმეს ვითარებაში ჩაგვაყენა, არამედ გვჭირდება ერთმანეთთან თანამშრომლობა, არა ტალახის სროლა, არამედ ერთმანეთის გვერდში დგომა, საერთო ოპოზიციური ფრონტი, რომლითაც უნდა დავარწმუნოთ ჩვენ მოქალაქეები, რომ საქართველოს აქვს მომავალი’’, – განაცხადა გიორგი ვაშაძემ.
ავტორი
თამთა ასლანიშვილი