პარტია ,,ახალი საქართველოს” ლიდერი, გიორგი ვაშაძე, ,,ქართულ ოცნების” ანალოგად ,,დამსხვრეულ ოცნებას” ასახელებს და აღნიშნავს, რომ მისი ერთადერთი მიზანი საზოგადოებისთვის თავისუფალი არჩევანის წართმევაა. მმართველი ხელისუფლების ოპონენტი, პარტია ,,ახალი საქართველოს” საარჩევნო სტრატეგიების გავრცელებას უახლოეს დღეებში აანონსებს და აღნიშნავს, რომ მთავარი არის ბრძოლა, რომელიც არჩევნების გაყალბებას ეწინააღმდეგება:
„უნდა გვესმოდეს, რომ ჩვენს წინაშე დგას დამსხვრეული ოცნებების პარტია, რომელსაც აქვს ერთადერთი მიზანი – ხალხს რამენაირად გამოსტაცოს თავისუფალი არჩევანი. ჩვენთვის ნომერ პირველი ამოცანაა ოპოზიციის თანამშრომლობა და კოორდინაცია. მრავალფეროვნებით ერთიანობა – ესაა ფორმულა, რომლითაც ჩვენ აუცილებლად უნდა გავიმარჯვოთ და აქ ძალიან მნიშვნელოვანია, რომ მაჟორიტარულ ოლქებში, სადაც ეს შესაძლებელია, იყოს შეთანხმება. თუნდაც ის ექვსი მაჟორიტარული ოლქი, რომელზეც ჩვენ შევთანხმდით თბილისში, ოპოზიციურ პარტიებს შორის საერთო მისწრაფებებს აჩვენებს. ამას ძალიან დიდი მნიშვნელობა აქვს.
ჩვენს საარჩევნო სტრატეგიასთან დაკავშირებით, სავარაუდოდ, ორშაბათს ან სამშაბათს გვექნება განცხადება, რომელსაც გავავრცელებთ და მომავალ კვირაში ჩვენი გუნდი სტარტს მივცემთ საარჩევნო კამპანიას.
ჩვენთვის მთავარია საერთო ოპოზიციური ფორმატი არჩევნების გაყალბების წინააღმდეგ ბრძოლისთვის და იმ სამომავლო კოალიციის ჩანასახების დანახვისთვის, რომელიც ასე უნდა ხალხს,” – განაცხადა გიორგი ვაშაძემ.
აღნიშნული ინფორმაცია, პარტია ,,ახალი საქართველოს” პრესსამსახურმა გაავრცელა.