თბილისის სააპელაციო სასამართლომ დავით სარალიძის მკვლელობისთვის მიხეილ კალანდიას თავისუფლების აღკვეთა 15 წლის ვადით შეუფარდა, თუმცა არასრულწლოვანთა მართლმსაჯულების კოდექსის თანახმად, პატიმრობის 15 წლიანი ვადა, 11 წელსა და 3 თვემდე შეუმცირდა.
მიხეილ კალანდიას სააპელაციო საჩივარს მოსამართლეთა კოლეგია, თითქმის, 3 თვის განმავლობაში განიხილავდა.
ცნობისთვის, მიხეილ კალანდია დავით სარალიძის განზრახ მკვლელობის ბრალდებით 2019 წლის 4 ივლისს დააკავეს.
სასამართლოს დღეს მიღებულ გადაწყვეტილებას არ ეთანხმებიან მიხეილ კალანდიას ოჯახის წევრები. ისინი ამ გადაწყვეტილებას მონურ მორჩილებას უკავშირებენ და ამბობენ, რომ ბრძოლას აუცილებლად გააგრძელებენ და უდანაშაულო ადამიანის ციხეში ყოფნას არავის შეარჩენენ:
“მე სასამართლოში შესვლამდეც ვთქვი, რომ არაფერი შეიცვლებოდა. მოსამართლე დასკვნითი სიტყვის შემდეგ, ამ მტკიცებულებების მერე ამტკიცებს, რომ თურმე 20 წლის ბიჭი უნდა გავუშვათ ციხეში 11 წლითა და 3 თვით. ძალიან სარკაზმულია მათი მხრიდან ეს ყველაფერი და ჩვენ უბრალოდ გავაგრძელებთ ბრძოლას. არავინ ვაპირებთ დანებებას და გაჩერებას!
მიხეილ კალანდიას 11 წლითა და 3 თვით არავის შევარჩენთ ციხეში იმიტომ, რომ უდანაშაულო ადამიანების ადგილი ციხეში არ არის,” – განაცხადა სასამართლო სხდომის დასრულების შემდეგ მიხეილ კალანდიას ძმამ, ლუკა კალანდიამ.
ავტორი
მახო ზავრაშვილი
