დღეს პოლიტიკური პარტია “ახალი საქართველოს” მესამე, რიგგარეშე, ყრილობა გაიმართა. ყრილობამ ერთხმად დაამტკიცა პარტიის სახელის ცვლილება და დღეიდან პარტიის სახელწოდებად განისაზღვრა “გიორგი ვაშაძე – სტრატეგია აღმაშენებელი”. ყრილობაზე სიტყვით გამოვიდა პარტიის თავმჯდომარე გიორგი ვაშაძე, რომელმაც აღნიშნა, რომ მის პარტიას აქვს მზარდი რეიტინგი და სტრატეგია აღმაშენებლის გუნდს ასობით ახალი წევრი უერთდება. ოპოზიციონერმა ლიდერმა მხარდაჭერებს ასევე გააცნო პარტიის გეგმები მომავალ არჩევნებში:
“პირველ რიგში უნდა აღინიშნოს, რომ ჩვენ, რეიტინგების მიხედვით, ვართ პოლიტიკური ძალა და იგი ერთადერთია, რომლის რეიტინგიც იზრდება. ყველას რეიტინგი მცირდება, ჩვენი რეიტინგი იზრდება.
მეორე: იცით, რომ ჩვენ ძალიან ბევრი ვიმუშავეთ საერთო ოპოზიციური ფრონტის შესაქმნელად და ეს არის ძალიან მნიშვნელოვანი. ჩვენ ძალიან ბევრი ვიფიქრეთ იმაზე, თუ რა შემთხვევაში დავანარცხებდით “ქართულ ოცნებას” და ივანიშვილს. ფორმულა, რომლითაც ჩვენ ამ არჩევნებზე გავდივართ, ეს არის “მრავალფეროვნებით ერთიანობა”, რაც ნიშნავს იმას, რომ ოპოზიცია ერთიანი უნდა იყოს არჩევნების გაყალბების წინააღმდეგ, ერთიანი უნდა იყოს, თბილისში შემდგარი შეთანხმება შენარჩუნდეს და რეგიონებში მაჟორიტარულ ოლქებში კანდიდატების დაყენებისას ასევე მოხდეს შეთანხმება, ხოლო რაც შეეხება პროპორციულ არჩევნებს, საქართველოს მოქალაქეებს მიეცეთ მრავალფეროვანი არჩევანის გაკეთების საშუალება, რათა არ დაიკარგოს ოპოზიციის არცერთი ამომრჩევლის ხმა. მე აბსოლიტურად გულწრფელად გეტყვით, რომ ჩვენი პოლიტიკური ძალა ჯერჯერობით ვართ გაერთიანებული ოპოზიცია “ძალა ერთობაშიას” წევრი, მაგრამ მომავალ კვირაში გვექნება შეხვედრა პარტნიორ პარტიებთან, რა დროსაც წარვუდგენთ ჩვენს სტრატეგიას და გადავწყვეტთ – არჩევნებზე ერთად წავალთ თუ ცალ-ცალკე.
მესამე: ოპოზიციამ აუცილებლად უნდა ვთქვათ უარი ქილიკსა და ერთმანეთზე თავდასხმებზე, იმიტომ რომ ეს უნდა “ქართულ ოცნებასა” და ბიძინა ივანიშვილს. იყო ასეთი მცდელობები და მე პირდაპირ განვაცხადე მაშინ – “ოპოზიციის ოპოზიციონერობა ეს არის ხელისუფლების თამაში” და ჩვენ შევთავაზეთ ოპოზიციურ ძალებს ერთმანეთზე თავდაუსხმელობის მემორანდუმის გაფორმება” – განაცხადა გიორგი ვაშაძემ.
ინფორმაციისთვის: ყრილობამ დაამტკიცა პოლიტიკური პარტია “გიორგი ვაშაძე სტრატეგია აღმაშენებლის” პოლიტიკური საბჭოსა და სარევიზიო კომისიის შემადგენლობა.
პოლიტიკური საბჭოს წევრებია: პაატა მანჯგალაძე, თეონა ჭალიძე, ედნარ მგელაძე, ანა კობახიძე, თამთა შამათავა, ნანა ტოხვაძე, გიორგი ხაბურზანია, ლაშა დიაროვი, დავით თოფურია, სერგო ჩიხლაძე, დავით ცეკვავა.
სარევიზიო კომისიის წევრებად დასახელდნენ: ალექსი ნონიაძე, ანა ბექაური, ვალისა ღვინჯილია და ანა მოსაშვილი.