პრემიერ-მინისტრმა გიორგი გახარიამ მთავრობის სხდომის დაწყებამდე დენდროლოგიური პარკის გახსნაზე ისაუბრა და აღნიშნა, რომ წლების განმავლობაში ცილისწამების მიუხედავად, ბუნების დიდი სიყვარულით და ბიძინა ივანიშვილის ქველმოქმედების შედეგად საქართველოს უნიკალური პარკი გაიხსნა:
„გუშინ იყო უაღრესად მნიშვნელოვანი დღე. რა თქმა უნდა, ეს არ იყო მნიშვნელოვანი დღე მხოლოდ გურიისთვის, ეს იყო მნიშვნელოვანი დღე საქართველოსთვის, როდესაც, ჩვენი რიგითი მოქალაქეებისთვის, შეკვეთილის დენდროლოგიური პარკი გაიხსნა, უნიკალური პროექტი, რომელიც ბიძინა ივანიშვილის ქველმოქმედების შედეგად განხორციელდა და ვხედავთ, თუ რამხელა შრომის შედეგია დღეს ეს პარკი.
სიმბოლური გახლავთ ის, რომ წლების განმავლობაში ცილისწამების მიუხედავად, ეს დიდი საქმე გაკეთდა ბუნების დიდი სიყვარულით და ჩვენი მოქალაქეებისთვის და ქვეყნისთვის უნიკალური პარკი გაიხსნა. ეს არ გახლავთ მხოლოდ საქართველოსთვის უნიკალური, ეს გახლავთ მსოფლიოში უნიკალური პარკი, რომელიც ხელმისაწვდომი იქნება ჩვენი ყველა მოქალაქისთვის, ბავშვებისთვის და ჩვენი ქვეყნის სტუმრებისთვის.
რა თქმა უნდა, ყველამ უნდა დავინახოთ, რომ საბოლოო ჯამში, ყველაფრის მიუხედავად, სიმართლე მაინც იმარჯვებს“, – განაცხადა გიორგი გახარიამ.
ავტორი
თამთა ბარბაქაძე
