ნომერი პირველი ამოცანაა ბიძინა ივანიშვილი და “ქართული ოცნება” ხელისუფლებაში აღარ იყოს, იმიტომ რომ მათ გააღატაკეს საქართველო და ჩამოშალეს ჩვენი პროდასავლური კურსი – გიორგი ვაშაძე

მედიაში გავრცელებულ ინფორმაციას, გაერთიანებული ოპოზიციიდან სავარაუდოდ რამდენიმე პარტიის გამოყოფას ეხმაურება პარტია „ახალი საქართველოს“ ლიდერი. გიორგი ვაშაძე აცხადებს, რომ მის გუნდს ჩამოყალიბებული აქვს სტრატეგია და გამარჯვების ფორმულა მრავალფეროვან ერთიანობაშია. ოპოზიციონერი ლიდერის განმარტებით აუცილებლად უნდა დასახელდეს პრემიერობის კანდიდატი, ასევე „ჩრდილოვანი კაბინეტი“ და გზა გაუხსნან ახალი თაობის პროფესიონალებს.

„ცალსახად ჩამოყალიბებული გვაქვს მე და „სტრატეგია აღმაშენებლის“ გუნდს, რომ გამარჯვება არის მრავალფეროვან ერთიანობაში. რაც გულისხმობს, რომ სწორი გზით მივდივართ. პირველი, ოპოზიცია შეთანხმდა მაჟორიტარულ კანდიდატებთან დაკავშირებით, რითიც დიდი ერთიანობა ვაჩვენეთ, ჩამოვაყალიბეთ და შევქმენით საერთო ოპოზიციური ფრონტი. რაც შეეხება პროპორციულ ნაწილს, ამაზე დავსხდებით და ვისაუბრებთ.

ჩვენი სტრატეგია და ხედვაა, რომ აუცილებლად უნდა იყოს დასახელებული პრემიერ-მინისტრობის კანდიდატი, ასევე „ჩრდილოვანი კაბინეტი“ და გავუხსნათ გზა ახალი თაობის პროფესიონალებს, რომლებსაც მაღალი ნდობა ექნებათ საზოგადოების მხრიდან და აქედან გამომდინარე მივიღებთ გადაწყვეტილებებს.

მთავარი ჩემთვის არის, რომ დიდი ერთიანობა თავისი მრავალფეროვნებით არის გამარჯვების ფორმულა ამ არჩევნებზე. რას ვგულისხმობ ამაში, რომ მაჟორიტარულ ოლქებში მაქსიმალურად ფართო თანამშრომლობა უნდა იყოს, პროპორციულ ნაწილში კი ყველა ოპოზიციური ხმის წამოღება, რომ რაც შეიძლება ცოტა დავუტოვოთ „ქართულ ოცნებას“.

საერთო ფრონტზე, საერთო ჭრილში, მივიღებთ მშვიდად და წყნარად გადაწყვეტილებებს და მივყვებით საერთო სტრატეგიას, ამოცანა ნომერი პირველი არის, რომ ბიძინა ივანიშვილი და „ქართული ოცნება“ ხელისუფლებაში აღარ უნდა იყოს, იმიტომ, რომ მათ გააღატაკეს საქართველო და ჩამოშალეს ჩვენი პროდასავლური კურსი,“ – აცხადებს გიორგი ვაშაძე.

ავტორი
თამთა ასლანიშვილი