საქართველოს საგარეო საქმეთა მინისტრი, დავით ზალკალიანი ევროკომისიის მიერ გამოქვეყნებულ ანგარიშს ეხმაურება და აღნიშნავს, რომ დოკუმენტი საქართველოს ხელისუფლების კიდევ ერთი აღიარებაა. მისი თქმით, ქვეყანა წარმატებით ართმევს თავს აღებულ ვალდებულებებს და შესაბამისად ევროკავშირთან მოპოვებულ უვიზო მიმოსვლის რეჟიმს საფრთხე არ ემუქრება. მინისტრი ასევე საუბრობს ევროკომისიის დადებით შეფასებებზე, რომელიც Covid-19-ის კრიზისის ფონზე საქართველოს მთავრობის მიერ გატარებულ ქმედით ღონისძიებებს უკავშირდება:
,,ეს ანგარიში საქართველოს ხელისუფლების კიდევ ერთი აღიარებაა, წარმატებული საქმიანობის სავიზო ლიბერალიზაციის შესრულებასთან მიმართებით. დოკუმენტში აღნიშნულია, რომ ქვეყანა წარმატებით აგრძელებს აღებული ვალდებულების შესრულებას. ერთ-ერთ უმნიშვნელოვანეს მიღწევას ევროკავშირთან, უვიზო მიმოსვლის რეჟიმს, საფრთხე არ ემუქრება.
ევროკომისიის შეფასებით, საქართველოს ხელისუფლების მიერ მნიშვნელოვანი ნაბიჯებია გადადგმული მოქალაქეების უკანონო მიგრაციისა და ასევე, დანაშაულებრივი ქმედების აღკვეთისთვის. ასევე, ხაზგასმით აღსანიშნავია, რომ ანგარიშში მოხვდა ნაყოფიერი თანამშრომლობა „ფონსტექსთან“, ასევე წარმატებულია საქართველოს თანამშრომლობა ევროპოლთან, ამასთანავე, პოზიტიურად არის შეფასებული პოლიციის ,,ატაშეების“ ქსელის ზრდა ევროკავშირის შენგენის ქვეყნებში.
რაც ასევე მნიშვნელოვანია აღინიშნოს, ევროკომისია უაღრესად დადებითად აფასებს Covid-19-ის კრიზისის ფონზე საქართველოს მთავრობის მიერ გატარებულ ქმედით ღონისძიებებს, მათ შორის, საზღვრის ჩაკეტვასა და საგანგებო მდგომარეობის გამოცხადებას.
ასევე, ანგარიშში ხაზგასმითაა აღნიშნული, საქართველოს საგარეო საქმეთა სამინისტროს მიერ საზღვარგარეთ მყოფი მოქალაქეების სამშობლოში დაბრუნება და აღნიშნულია, რომ 13 ათას მოქალაქეზე მეტი დაბრუნდა ორგანიზებულად და ეტაპობრივად სამშობლოში,“ – განაცხადა დავით ზალკალიანმა.
ავტორი
ქეთა გაბრიაძე
