,,ევროპული საქართველოს“ ერთ-ერთმა ლიდერმა, გიგი უგულავამ ,,ქართული ოცნების“ ნაბიჯები შეაფასა და ამჟამინდელი მმართველობა დემოკრატიის უკუსვლის მთავარ გამომწვევ მიზეზად დაასახელა. ხელისუფლების ოპონენტის თქმით, მმართველი პარტიის ყურადღებას, ამერიკული ინვესტიციების ნაცვლად რუსული უფრო იპყრობს. გიგი უგულავას ასევე მიაჩნია, რომ დღევანდელი მმართველი ძალა პუტინის მეგობარი ხელისუფლებაა:
,,ნაბიჯები, რომლებიც საქართველოს მოქალაქეებმა უნდა გადავდგათ არის ის, რომ ჩამოვიშოროთ პუტინის მეგობარი ხელისუფლება. საქართველოს პარტნიორი ქვეყნები, თავისუფალი სამყაროდან აცნობიერებენ და ღიად აცხადებენ იმას, რომ ბიძინა ივანიშვილი და ,,ქართული ოცნების“ ხელისუფლება არის პუტინის დესტაბილიზაციის წყარო საქართველოში.
ივანიშვილის ,,ოცნება“, გეგმაზომიერად ებრძვის ამერიკულ ინვესტიციებს და მუშაობს რუსულ ინვესტიციებზე. ამის მაგალითები მოყვანილია, თუ როგორ ექცევა ბიძინა ივანიშვილი პარტნიორებს და ის შეფასებულია, როგორც საერთაშორისო მატყუარა, გადამგდები, თაღლითი და როგორც დემოკრატიის უკუსვლის მთავარი გამომწვევი მიზეზი ქვეყანაში.
შეკითხვა სწორად და გლობალურადაა დასმული: თუ არა აშშ-მ, მაშინ ვინ უნდა იბრძოლოს და დაუდგეს ქართულ საზოგადოებას გვერდით, თავისუფლებასა და დემოკრატიისთვის ბრძოლაში?! – ეს არის ძალიან მკაფიო გზავნილი ,,ქართული ოცნების” მიმართ.
შეუიარაღებელი თვალითაც ჩანს, რომ ბიძინა ივანიშვილის დამოკიდებულება, თავისუფალ სამყაროსთან სკეპტიკურია და ის არ განიხილება, როგორც ჩვენი მოკავშირეების პარტნიორი, შესაბამისად მარტივად შეგვიძლია ვთქვათ, რომ ჯვარია მასზე დასმული,” – აცხადებს გიგი უგულავა.
ავტორი
ქეთა გაბრიაძე
