ალეკო ელისაშვილის მიერ გიორგი ვაშაძისა და სხვა ოპოზიციური პარტიების ლიდერების ლანძღვას პასუხობს „ახალი საქართველოს“ გენერალური მდივანი და აღნიშნავს, რომ მათი ინტერესი არ არის ელისაშვილთან ან სხვა რომელიმე პოლიტიკურ ლიდერებთან კონფრონტაციაში შესვლა, რადგან მხოლოდ ერთიანობით დაამარცხებენ ივანიშვილის მარიონეტულ რეჟიმს. პაატა მანჯგალაძე ასევე განმარტავს, რომ თუ ალეკო ელისაშვილის ამოცანა ბუტაფორიული ოპოზიციონერობა და კინტოს როლია პოლიტიკაში, მაშინ ამაზე შესაბამისი რეაქცია ექნებათ:
“ელისაშვილი რაც მეტს ისაუბრებს უფრო ღრმად ჩაეფლობა იმ პოლიტიკურ გაურკვევლობასა და ჭაობში რომელშიც იმყოფება. ჩემთვის ერთი მხრივ გაუგებარია რას ემსახურება გიორგი ვაშაძისა და საერთო ოპოზიციის კანდიდატების ლანძღვა და მეორე მხრივ ჭიჭინაძით აღფრთოვანება, რომელიც გაურკვეველი პოლიტიკური წარმონაქმნია და თავად არ გამორიცხავს სუსთან მის თანამშრომლობას.
კიდევ ერთხელ ვიმეორებ, ჩვენი ინტერესი არ არის ალეკო ელისაშვილთან ან სხვა რომელიმე პოლიტიკურ ლიდერებთან კონფრონტაციაში შესვლა, რადგან ზუსტად ვიცით მხოლოდ ერთიანობითა და კოორდინაციით შეიძლება ივანიშვილის მარიონეტული მთავრობის შეცვლა და თუ მასაც იგივე მიზნები ამოძრავებს, უნდა შეიგნოს, რომ ოპოზიციის ოპოზიციონერობით ბიძინა ივანიშვილს ვერ შევცვლით.
ხოლო თუ მისი ამოცანა ხელისუფლების ცვლილება კი არა, არამედ ბუტაფორიული ოპოზიციონერობა და კინტოს როლია პოლიტიკაში, მაშინ ამაზე ჩვენ შესაბამისი რეაქცია გვექნება და გაცილებით ფართო აუდიტორიას მეტი ინტენსივობით მივაწვდით ამის შესახებ,” – განაცხადა პაატა მანჯგალაძემ.
ავტორი
თამთა ასლანიშვილი