„დასანანია ის როგორც ელისაშვილი, ჭიჭინაძე და ოპოზიციის ზოგიერთი წარმომადგენელი იქცევა, როცა შანსს არ უშვებენ და თავს ესხმიან ოპოზიციის ახალი თაობის გამორჩეულ ლიდერს გიორგი ვაშაძეს,“ – ამის შესახებ პარტია „ახალი საქართველოს“ გენერალურმა მდივანმა პაატა მანჯგალაძემ განაცხადა. მისი თქმით ოპოზიციის ლიდერის კრიტიკით ამომრჩევლების მიმხრობა პრიმიტიული ქმედებაა, რაც პოლიტიკოსის დაბალ კულტურაზე მიუთითებს. “ახალი საქართველოს” გენერალური მდივანი ასევე აღნიშნავს, რომ გამარჯვების ფორმულა ოპოზიციის მაქსიმალურ კოორდინაციასა და ერთიანობაშია და არა დაპირისპირებასა და კინკლაობაში.
„სხვა ოპოზიციის ლიდერის კრიტიკით მიიმხრო უკვე არსებული ოპოზიციურად განწყობილი ამომრჩეველი, იაფფასიანი, პრიმიტიული ტაქტიკაა, რაც პოლიტიკოსის დაბალ პოლიტიკურ კულტურაზე მიუთითებს. დასანანია, როგორც ელისაშვილი, ჭიჭინაძე და ოპოზიციის ზოგიერთი წარმომადგენელი იქცევა, როცა შანსს არ უშვებენ და თავს ესხმიან ოპოზიციის ახალი თაობის გამორჩეულ ლიდერს გიორგი ვაშაძეს, რაც, ბუნებრივია, არ ემსახურება ივანიშვილის წინააღმდეგ საერთო ბრძოლის ინტერესებს.
ვიდრე ივანიშვილისგან ჩამოწერილი ჭიჭინაძის მსგავსი ოპოზიციონერები გიორგი ვაშაძის კრიტიკას დაიწყებენ, უმჯობესია დაფიქრდნენ რა გაუკეთებია გიორგი ვაშაძეს, რა გაუკეთებიათ მათ და ისე დაიწყონ მასზე საუბარი.
ჩვენ გვაქვს ჩვენი სამოქმედო სტრატეგია, რომელიც არა დაპირისპირებაზე, არამედ ერთიანობასა და აღმშენებლობაზეა ორიენტირებული და ბუნებრივია, საერთო ინტერესიდან გამომდინარე მათ კრიტიკას არ ავყვებით, შესაბამისად ამ საკითხზე მეტი დროის დახარჯვას არ ვაპირებთ. გამარჯვების ფორმულა ოპოზიციის მაქსიმალურ კოორდინაციასა და ერთიანობაშია და არა დაპირისპირებასა თუ კინკლაობაში. ძალა ერთობაშია!” – განაცხადა პაატა მანჯგალაძემ.
პაატა მანჯგალაძის პოზიციას პარტია “ახალი საქართველოს” პრესსამსახური ავრცელებს
