საქართველოს ეკონომიკისა და მდგრადი განვითარების სამინისტრო განცხადებას ავრცელებს, სადაც აღნიშულია, რომ ჩვენი ქვეყნის მთავრობა ყველაფერს გააკეთებს სტრატეგიული პარტნიორის, ამერიკის შეერთებული შტატების ბიზნესის სფეროს წარმომადგენლებისთვის შესაფერისი პირობების მისაცემად. მინისტრი ნათია თურნავა ასევე გამოეხმაურა სტატისტიკურ მაჩვენებელს 2020 წლის პირველ კვარტალში აშშ-დან საქართველოში განხორციელებული ინვესტიციების შესახებ:
„ძალიან სასიხარულოა, რომ აშშ-დან განხორციელებული პირდაპირი უცხოური ინვესტიციები 2020 წლის პირველ კვარტალში გლობალური პანდემიის მიუხედავად გაიზარდა. ესაა კიდევ ერთხელ დასტური იმისა, რომ ჩვენ, „ქართული ოცნების“ გუნდი ვაყალიბებთ ისეთ საინვესტიციო გარემოს, რომელიც მიმზიდველია ინვესტორებისთვის.
ყველაფერს გავაკეთებთ იმისთვის, რომ აშშ-ის კომპანიებმა კიდევ უფრო კომფორტულად იგრძნონ თავი. ჩვენი სამინისტროს კარი ყოველთვის ღიაა მათთვის, რათა გავიაროთ თითოეული პრობლემა და საკითხი, რაც მათ წინაშე შეიძლება დადგეს, გადავწყვიტოთ ყველაფერი ისე, რომ უფრო მეტი ამერიკული ინვესტიცია გვქონდეს მომავალში,“ – განაცხადა ნათია თურნავამ.
ოფიციალური სტატისტიკით, საქართველოს უმნიშვნელოვანესი სტრატეგიული პარტნიორი ქვეყანა ერთ-ერთი მთავარი ინვესტორია – 2020 წლის I კვარტალის მონაცემით ამერიკული ინვესტიციები 34%-ით გაიზარდა და 17%-იანი წილით მეორე ადგილი დაიკავა უმსხვილეს ინვესტორ ქვეყნებს შორის.