ჟურნალისტ გიორგი გაბუნიას შესაძლო ლიკვიდაციასთან დაკავშირებულ საკითხს ეხმაურება საქართველოს პრემიერ–მინისტრი გიორგი გახარია და განმარტავს, რომ სამართალდამცავებმა ყველაფერი უნდა გააკეთონ იმისათვის, რომ დაიცვან და საფრთხე არ დაემუქროს კონკრეტულ ადამიანს, ჟურნალისტს. მთავრობის მეთაური ასევე აცხადებს, რომ კონკრეტული ადამიანების დაცვა სამართალდამცავების პასუხისმგებლობაა, გამოძიება დროული უნდა იყოს, რომ მტრებს სპეკულირების საშუალება არ მიეცეთ:
„რამდენიმე საკითხია ძალზედ მნიშვნელოვანი:
- პირველი, – საქართველოს სამართალდამცავმა სისტემამ, კონკრეტულმა უწყებამ მძიმე დანაშაული აღკვეთა. ეს ფაქტია!
- მეორე, – საქართველოს სამართალდამცავმა სისტემამ ყველაფერი უნდა გააკეთოს იმისთვის, რომ კონკრეტულ ადამიანს, კონკრეტულ ჟურნალისტს, არანაირი საფრთხე არ დაემუქროს. ეს მათი პასუხისმგებლობაა და ეს ყველაფერთან ერთად ეს ჩვენი დემოკრატიისა და ჩვენი ქვეყნის უსაფრთხოების ხარისხის მაჩვენებელია;
- მესამე, – კონკრეტულმა უწყებამ და საქართველოს სამართალდამცავმა სისტემამ, უმოკლეს ვადებში, ეს ყველაფერი უნდა გამოიძიოს და საზოგადოებას აბსოლუტურად გამჭვირვალე სურათი მისცეს იმისათვის, რომ ქვეყნის მტრებს, არც ქვეყნის გარეთ და არც ქვეყნის შიგნით, არავის არ უნდა მივცეთ სპეკულირების შესაძლებლობა, რომ ეს ყველაფერი პოლიტიკური ინტერესებიდან გამომდინარე გამოიყენონ“, – განაცხადა გიორგი გახარიამ.
ავტორი
თამთა ასლანიშვილი
