საარჩევნო სიებთან დაკავშირებით ჟურნალისტების მიერ დასმულ შეკითხვას პრემიერ-მინისტრი პასუხობს, რომ არ უფიქრია სიებზე, რადგანაც ამ ეტაპზე აქტუალურია სხვა საკითხები – პანდემია, ეპიდემია, ეკონომიკური კრიზისი:
“ნუ ვჩქარობთ, ხალხნო, სიებთან დაკავშირებით. ჯერ ჩვენ გვაქვს კონკრეტული ამოცანები. ეს არის პანდემია, ეპიდემია, ეკონომიკური კრიზისი. საერთოდ წარმოდგენა არ მაქვს და არც მიფიქრია ამ სიაზე. ჯერ ადრეა, არ არის ამაზე საუბარი, არანაირი კონსულტაციები არ მიდის, რა დროს კონსულტაციებია. ჩვენ დღეს იმდენი მიმდინარე საკითხები საოპერაციო დონეზე გვაქვს გასაკეთებელი, რომ საეროდ არც გვიფიქრია ამაზე,” – განაცხადა გიორგი გახარიამ.
საარჩევნო სიაში ე.წ. ქვოტებთან და ამ სიის განსაზღვრაში ბიძინა ივანიშვილის როლთან დაკავშირებით საუბრისას მთავრობის მეთაური აღნიშნავს, რომ ბიძინა ივანიშვილს, როგორც პარტია “ქართული ოცნების” თავმჯდომარეს, სრული უფლება აქვს იყოს საარჩევნო სიის განმსაზღვრელი:
“რას ნიშნავს კვოტა?! ხალხნო, ჩვენ ვსაუბრობთ გუნდურ მუშაობაზე. “ქართული ოცნება” არის გუნდი, რომელსაც ჰყავს თავისი თავმჯდომარე. რატომ გიკვირთ, რომ პარტიის თავმჯდომარე იყოს განმსაზღვრელი და მის აზრს ჰქონდეს განმსაზღვრელი მნიშვნელობა იმასთან დაკავშიებით, პოლიტიკურ სიაში, პარლამენტში, არჩევნების წინ, ვინ მოხვდება? ეს ნორმალურია. მე, როგორც გუნდის წევრი, როდესაც ეს განხილვები დაიწყება, ვაშინ ვიტყვი ჩემს სათქმელს. ჯერ ეს არც დაწყებულა, ნუ ჩქარობთ,” – აღნიშნა გიორგი გახარიამ.