აფხაზეთის უზენაესი საბჭოს ყოფილი თავჯდომარის, თამაზ ნადარეიშვილის შვილი, თავდაცვის ყოფილი მინისტრის, ბაჩო ახალაიას მეუღლე ანი ნადარეიშვილი ემოციურ შეფასება-განმარტებებს აკეთებს პატიმრობაში მყოფ საქართველოს მე-3 პრეზიდენტ, მიხეილ სააკაშვილთან დაკავშირებით:
“მიშა ქართულ პოლიტიკაში უბრალოდ ერთი ადამიანი არ არის, რომელმაც სხვა ბევრი პოლიტიკოსივით შემოისეირნა და მერე საპნის ბუშტივით გაქრა, ბევრი ვიცით ასეთი, მათ შორის, პრეზიდენტებიც. ის არის ეპოქა, მოვლენა, რომელმაც შეუძლებელი შესაძლებლად აქცია.
იყო დრო, როცა საქართველო ფეხზე იდგა, თავი მაღლა ეჭირა და მსოფლიოს თვალებში უყურებდა. ამ ეპოქას სახელი ჰქონდა – მიხეილ სააკაშვილი!
დღეს ტყვეობაშია იდეალისტი პრეზიდენტი, რომელმაც გაუბედურებული ქვეყანა განვითარების გზაზე გაიყვანა. და სწორედ იმიტომ ჰყავთ გამოკეტილი, რომ საქართველოს მტრებს დღემდე ეშინიათ მისი იდეების, ენერგიის, შესაძლებლობების…
ამდენ წლიანი ტყვეობის მიუხედავად ამ ადამიანის სახელი დღემდე დიდ ძალას ატარებს და მიუხედავად ტყვეობისა ის ქმნის პოლიტიკურ დღის წესრიგს დღესაც და ამ დღეებმა ეს ნათლად გვიჩვენა.
მიშას ისტორია აუცილებლად დაუფასებს მის ღვაწლს, ამას წყალი არ გაუვა. ვერასოდეს ვერ ჩაკლავენ თაობების მეხსიერებას, რომლებმაც უკვე ნახეს, რომ საქართველო შეიძლება სხვანაირიც იყოს, მაგრამ მანამდე მას მხოლოდ საკუთარი თავისუფლებისთვის არ უწევს ბრძოლა – მიშას აკისრია ისტორიული ვალდებულება, რომ დაასრულოს ეს 35 წლიანი დაუსრულებელი ეპოქა, დახუროს ისტორიის ეს თავი და საბოლოოდ გაიყვანოს საქართველო და ქართველი ხალხი სამშვიდობოზე“, – წერს ანი ნადარეიშვილი სოციალურ ქსელში.
