🦅 ბექობის არწივი (Aquila heliaca) – ერთ-ერთი ყველაზე შთამბეჭდავი და ამავე დროს მოწყვლადი ფრინველი

დაცული ტერიტორიების სააგენტო საინტერესო მასალას ავრცელებს საქართველოს ფაუნის უნიკალურ წარმომადგენელზე – ბექობის არწივზე (Aquila heliaca):

🦅 ბექობის არწივი (Aquila heliaca) საქართველოს დაცულ ტერიტორიებზე გავრცელებული ერთ-ერთი ყველაზე შთამბეჭდავი და ამავე დროს მოწყვლადი ფრინველია. იგი შეტანილია საქართველოს „წითელ ნუსხაში“.

🔹ამ სახეობის დაცვა პირდაპირ კავშირშია დაცული ტერიტორიების განვითარებასთან. ბექობის არწივი ერთ-ერთია იმ მნიშვნელოვან სახეობებს შორის, რომელთა დაცვის მიზნით, 2022 წელს შეიქმნა ნუგზარ ზაზანაშვილის სახელობის სამუხის მრავალმხრივი გამოყენების ტერიტორია.

🔹ბექობის არწივი გამოირჩევა შთამბეჭდავი ზომებით – მისი სხეულის სიგრძე დაახლოებით 80 სმ-ია, ხოლო ფრთების შლილი 2 მეტრს აღწევს. მისი ხმა მკაცრ, განმეორებად ყეფას ჰგავს. საქართველოში იგი ძირითადად მთისძირა ლანდშაფტებში, ბორცვებსა და ჭალებში ბინადრობს, სადაც საკვების მნიშვნელოვან წყაროს წვრილი ძუძუმწოვრები, ქვეწარმავლები და მცირე ზომის ფრინველები წარმოადგენს.

🔹დღეს ბექობის არწივზე დაკვირვება შესაძლებელია საქართველოს რამდენიმე დაცულ ტერიტორიაზე, მათ შორის ჭაჭუნას აღკვეთილში, სადაც სპეციალური სამეთვალყურეო პუნქტიცაა მოწყობილი. მსგავსი ინფრასტრუქტურა ხელს უწყობს როგორც ეკოტურიზმის განვითარებას, ისე საზოგადოების ცნობიერების ამაღლებას ამ უნიკალური სახეობის დაცვის მნიშვნელობაზე.